OSEE PROPHETA 3

₁et dixit Dominus ad me

adhuc vade dilige mulierem dilectam amico et adulteram

sicut diligit Dominus filios Israhel

et ipsi respectant ad deos alienos

et diligunt vinacea uvarum

₂et fodi eam mihi quindecim argenteis

et choro hordei et dimidio choro hordei

₃et dixi ad eam dies multos expectabis me

non fornicaberis et non eris viro sed et ego expectabo te

₄quia dies multos sedebunt filii Israhel sine rege et sine principe

et sine sacrificio et sine altari et sine ephod et sine therafin

₅et post haec revertentur filii Israhel

et quaerent Dominum Deum suum et David regem suum

et pavebunt ad Dominum et ad bonum eius in novissimo dierum