OSEE PROPHETA 2

₁dicite fratribus vestris Populus meus

et sorori vestrae Misericordiam consecuta

₂iudicate matrem vestram

iudicate quoniam ipsa non uxor mea et ego non vir eius

auferat fornicationes suas a facie sua

et adulteria sua de medio uberum suorum

₃ne forte expoliem eam nudam

et statuam eam secundum diem nativitatis suae

et ponam eam quasi solitudinem

et statuam eam velut terram inviam et interficiam eam siti

₄et filiorum illius non miserebor

quoniam filii fornicationum sunt

₅quia fornicata est mater eorum

confusa est quae concepit eos

quia dixit vadam post amatores meos

qui dant panes mihi et aquas meas

lanam meam et linum meum oleum meum et potum meum

₆propter hoc ecce ego sepiam viam tuam spinis

et sepiam eam maceria et semitas suas non inveniet

₇et sequetur amatores suos et non adprehendet eos

et quaeret eos et non inveniet

et dicet vadam et revertar ad virum meum priorem

quia bene mihi erat tunc magis quam nunc

₈et haec nescivit quia ego dedi ei frumentum et vinum et oleum

et argentum multiplicavi ei et aurum quae fecerunt Baal

₉idcirco convertar et sumam frumentum meum in tempore suo

et vinum meum in tempore suo

et liberabo lanam meam et linum meum

quae operiebant ignominiam eius

₁₀et nunc revelabo stultitiam eius in oculis amatorum eius

et vir non eruet eam de manu mea

₁₁et cessare faciam omne gaudium eius

sollemnitatem eius neomeniam eius

sabbatum eius et omnia festa tempora eius

₁₂et corrumpam vineam eius et ficum eius

de quibus dixit mercedes hae meae sunt

quas dederunt mihi amatores mei

et ponam eam in saltu et comedet illam bestia

agri

₁₃et visitabo super eam dies Baalim quibus accendebat incensum

et ornabatur inaure sua et monili suo

et ibat post amatores suos et mei obliviscebatur dicit Dominus

₁₄propter hoc ecce ego lactabo eam

et ducam eam in solitudinem et loquar ad cor eius

₁₅et dabo ei vinitores eius ex eodem loco

et vallem Achor ad aperiendam spem

et canet ibi iuxta dies iuventutis suae

et iuxta dies ascensionis suae de terra Aegypti

₁₆et erit in die illo ait Dominus

vocabit me Vir meus et non vocabit me ultra Baali

₁₇et auferam nomina Baalim de ore eius

et non recordabitur ultra nominis eorum

₁₈et percutiam eis foedus in die illa cum bestia agri

et cum volucre caeli et cum reptili terrae

et arcum et gladium et bellum conteram de terra

et dormire eos faciam fiducialiter

₁₉et sponsabo te mihi in sempiternum

et sponsabo te mihi in iustitia et iudicio

et in misericordia et miserationibus

₂₀et sponsabo te mihi in fide et scies quia ego Dominus

₂₁et erit in illa die

exaudiam dicit Dominus exaudiam caelos et illi exaudient terram

₂₂et terra exaudiet triticum et vinum et oleum

et haec exaudient Hiezrahel

₂₃et seminabo eam mihi in terram

et miserebor eius quae fuit absque misericordia

₂₄et dicam non populo meo populus meus tu

et ipse dicet Dominus meus es tu