LIBER EZRAE 10

₁sic ergo orante Ezra et inplorante eo

et flente et iacente ante templum Dei

collectus est ad eum de Israhel coetus grandis nimis

virorum et mulierum puerorumque

et flevit populus multo fletu

₂et respondit Sechenia filius Iehihel de filiis Helam et dixit Ezrae

nos praevaricati sumus in Deum nostrum

et duximus uxores alienigenas de populis terrae

et nunc si est paenitentia Israhel super hoc

₃percutiamus foedus cum Deo nostro

ut proiciamus universas uxores et eos qui de his nati sunt

iuxta voluntatem Domini

et eorum qui timent praeceptum Dei nostri

secundum legem fiat

₄surge tuum est decernere nosque erimus tecum

confortare et fac

₅surrexit ergo Ezras

et adiuravit principes sacerdotum Levitarum et omnem

Israhel

ut facerent secundum verbum hoc

et iuraverunt

₆et surrexit Ezras ante domum Dei

et abiit ad cubiculum Iohanan filii Eliasib et ingressus est illuc

panem non comedit et aquam non bibit

lugebat enim in transgressione eorum

qui de captivitate venerant

₇et missa est vox in Iuda et in Hierusalem

omnibus filiis transmigrationis

ut congregarentur in Hierusalem

₈et omnis qui non venerit in tribus diebus

iuxta consilium principum et seniorum

auferetur universa substantia eius

et ipse abicietur de coetu transmigrationis

₉convenerunt igitur omnes viri Iuda et Beniamin in Hierusalem tribus

diebus

ipse est mensis nonus vicesimo die mensis

et sedit omnis populus in platea domus Dei

trementes pro peccato et pluviis

₁₀et surrexit Ezras sacerdos et dixit ad eos

vos transgressi estis et duxistis uxores alienigenas

ut adderetis super delictum Israhel

₁₁et nunc date confessionem Domino Deo patrum vestrorum

et facite placitum eius

et separamini a populis terrae et ab uxoribus alienigenis

₁₂et respondit universa multitudo dixitque voce magna

iuxta verbum tuum ad nos sic fiat

₁₃verumtamen quia populus multus est et tempus pluviae

et non sustinemus stare foris

et opus non est diei unius vel duorum

vehementer quippe peccavimus in sermone isto

₁₄constituantur principes in universa multitudine

et omnes in civitatibus nostris qui duxerunt uxores alienigenas

veniant in temporibus statutis

et cum his seniores per civitatem et civitatem et iudices

eius

donec avertatur ira Dei nostri a nobis super peccato hoc

₁₅igitur Ionathan filius Asahel et Iaazia filius Thecuae steterunt super

hoc

et Mesollam et Sebethai Levites adiuverunt eos

₁₆feceruntque sic filii transmigrationis

et abierunt Ezras sacerdos et viri principes familiarum

in domum patrum suorum

et omnes per nomina sua

et sederunt in die primo mensis decimi ut quaererent rem

₁₇et consummati sunt omnes viri

qui duxerant uxores alienigenas

usque ad diem primam mensis primi

₁₈et inventi sunt de filiis sacerdotum qui duxerant uxores alienigenas

de filiis Iosue filii Iosedech

et fratres eius Maasia et Eliezer et Iarib et Godolia

₁₉et dederunt manus suas ut eicerent uxores suas

et pro delicto suo arietem de ovibus offerrent

₂₀et de filiis Emmer Anani et Zebedia

₂₁et de filiis Erim Masia et Helia et Semeia et Hiehihel et Ozias

₂₂et de filiis Phessur Helioenai Maasia Ismahel

Nathanahel Iozabeth et Elasa

₂₃et de filiis Levitarum Iozabeth et Semei et Celaia ipse est Calita

Phataia Iuda et Eliezer

₂₄et de cantoribus Eliasub

et de ianitoribus Sellum et Telem et Uri

₂₅et ex Israhel de filiis Pharos Remia et Ezia et Melchia

et Miamin et Eliezer et Melchia et Banea

₂₆et de filiis Helam Mathania Zaccharias et Hiehil

et Abdi et Irimoth et Helia

₂₇et de filiis Zethua Helioenai Eliasib Mathania

et Ierimuth et Zabeth et Aziza

₂₈et de filiis Bebai Iohanan Anania Zabbai Athalai

₂₉et de filiis Bani Mosollam et Melluch et Adaia

Iasub et Saal et Ramoth

₃₀et de filiis Phaethmoab Edna et Chalal Banaias Maasias

Mathanias Beselehel et Bennui et Manasse

₃₁et de filiis Erem Eliezer Iesue Melchias Semeias Symeon

₃₂Beniamin Maloch Samarias

₃₃de filiis Asom Matthanai Matthetha Zabed

Elipheleth Iermai Manasse Semei

₃₄de filiis Bani Maaddi Amram et Huhel

₃₅Baneas et Badaias Cheiliau

₃₆Vannia Marimuth et Eliasib

₃₇Matthanias Mathanai et Iasi

₃₈et Bani

et Bennui Semei

₃₉et Salmias et Nathan

et Adaias

₄₀Mechnedabai Sisai Sarai

₄₁Ezrel et Selemau Semeria

₄₂Sellum Amaria Ioseph

₄₃de filiis Nebu Iaihel Matthathias Zabed Zabina

Ieddu et Iohel Banaia

₄₄omnes hii acceperunt uxores alienigenas

et fuerunt ex eis mulieres quae pepererant filios