HIEZECHIEL PROPHETA 8

₁et factum est in anno sexto

in sexto mense in quinta mensis

ego sedebam in domo mea et senes Iuda sedebant coram me

et cecidit super me ibi manus Domini Dei

₂et vidi et ecce similitudo quasi aspectus ignis

ab aspectu lumborum eius et deorsum ignis

et a lumbis eius et sursum quasi aspectus splendoris ut visio electri

₃et emissa similitudo manus adprehendit me in cincinno capitis mei

et elevavit me spiritus inter terram et caelum

et adduxit in Hierusalem in visione Dei

iuxta ostium interius quod respiciebat aquilonem

ubi erat statutum idolum zeli ad provocandam aemulationem

₄et ecce ibi gloria Dei Israhel

secundum visionem quam videram in campo

₅et dixit ad me fili hominis leva oculos tuos ad viam aquilonis

et levavi oculos meos ad viam aquilonis

et ecce ab aquilone portae altaris idolum zeli in ipso introitu

₆et dixit ad me fili hominis putasne vides tu

quid isti faciant abominationes magnas

quas domus Israhel facit hic ut procul recedam a sanctuario meo

et adhuc conversus videbis abominationes maiores

₇et introduxit me ad ostium atrii

et vidi et ecce foramen unum in pariete

₈et dixit ad me fili hominis fode parietem

et cum perfodissem parietem apparuit ostium unum

₉et dixit ad me ingredere

et vide abominationes pessimas quas isti faciunt hic

₁₀et ingressus vidi

et ecce omnis similitudo reptilium et animalium abominatio

et universa idola domus Israhel depicta erant in pariete

in circuitu per totum

₁₁et septuaginta viri de senioribus domus Israhel

et Hiezonias filius Saphan stabat in medio eorum stantium

ante picturas

et unusquisque habebat turibulum in manu sua

et vapor nebulae de ture consurgebat

₁₂et dixit ad me certe vides fili hominis

quae seniores domus Israhel faciunt in tenebris

unusquisque in abscondito cubiculi sui

dicunt enim non videt Dominus nos dereliquit Dominus terram

₁₃et dixit ad me

adhuc conversus videbis abominationes maiores quas isti faciunt

₁₄et introduxit me per ostium portae domus Domini

quod respiciebat ad aquilonem

et ecce ibi mulieres sedebant plangentes Adonidem

₁₅et dixit ad me certe vidisti fili hominis

adhuc conversus videbis abominationes maiores his

₁₆et introduxit me in atrium domus Domini interius

et ecce in ostio templi Domini inter vestibulum et altare

quasi viginti quinque viri dorsa habentes contra templum Domini

et facies ad orientem et adorabant ad ortum solis

₁₇et dixit ad me certe vidisti fili hominis

numquid leve est hoc domui Iuda

ut facerent abominationes istas quas fecerunt hic

quia replentes terram iniquitate

conversi sunt ad inritandum me

et ecce adplicant ramum ad nares suas

₁₈ergo et ego faciam in furore

non parcet oculus meus nec miserebor

et cum clamaverint ad aures meas voce magna non exaudiam eos