HIEZECHIEL PROPHETA 7

₁et factus est sermo Domini ad me dicens

₂et tu fili hominis haec dicit Dominus Deus terrae Israhel

finis venit finis super quattuor plagas

terrae

₃nunc finis super te

et emittam furorem meum in te

et iudicabo te iuxta vias tuas

et ponam contra te omnes abominationes tuas

₄et non parcet oculus meus super te et non miserebor

sed vias tuas ponam super te

et abominationes tuae in medio tui erunt

et scietis quia ego Dominus

₅haec dicit Dominus Deus adflictio una adflictio ecce venit

₆finis venit venit finis evigilavit adversum te ecce venit

₇venit contractio super te qui habitas

in terra

venit tempus prope est dies occisionis et non gloriae montium

₈nunc de propinquo effundam iram meam super te

et conpleam furorem meum in te

et iudicabo te iuxta vias tuas et inponam tibi omnia scelera tua

₉et non parcet oculus meus neque miserebor

sed vias tuas inponam tibi

et abominationes tuae in medio tui erunt

et scietis quia ego sum Dominus percutiens

₁₀ecce dies ecce venit

egressa est contractio

floruit virga germinavit superbia

₁₁iniquitas surrexit in virga impietatis

non ex eis et non ex populo neque ex sonitu eorum

et non erit requies in eis

₁₂venit tempus adpropinquavit dies

qui emit non laetetur et qui vendit non lugeat

quia ira super omnem populum eius

₁₃quia qui vendit ad id quod vendidit non revertetur

et adhuc in viventibus vita eorum

visio enim ad omnem multitudinem eius non regredietur

et vir in iniquitate vitae suae non confortabitur

₁₄canite tuba praeparentur omnes

et non est qui vadat ad proelium

ira enim mea super universum populum eius

₁₅gladius foris pestis et

fames intrinsecus

qui in agro est gladio morietur

et qui in civitate pestilentia et fame devorabuntur

₁₆et salvabuntur qui fugerint ex eis

et erunt in montibus quasi columbae convallium

omnes trepidi unusquisque in iniquitate sua

₁₇omnes manus dissolventur et omnia genua fluent aquis

₁₈et accingent se ciliciis et operiet eos formido

et in omni facie confusio et in universis capitibus eorum calvitium

₁₉argentum eorum foris proicietur

et aurum eorum in sterquilinium erit

argentum eorum et aurum eorum non valebit liberare eos

in die furoris Domini

animam suam non saturabunt et ventres eorum non implebuntur

quia scandalum iniquitatis eorum factum est

₂₀et ornamentum monilium suorum in superbiam posuerunt

et imagines abominationum suarum et simulacrorum fecerunt ex eo

propter hoc dedi eis illud in inmunditiam

₂₁et dabo illud in manus alienorum ad diripiendum

et impiis terrae in praedam

et contaminabunt illud

₂₂et avertam faciem meam ab eis et violabunt arcanum meum

et introibunt in illud emissarii et contaminabunt illud

₂₃fac conclusionem quoniam terra plena est iudicio sanguinum

et civitas plena iniquitate

₂₄et adducam pessimos de gentibus et possidebunt domos eorum

et quiescere faciam superbiam potentium

et possidebunt sanctuaria eorum

₂₅angustia superveniente requirent pacem et non erit

₂₆conturbatio super conturbationem veniet

et auditus super auditum

et quaerent visionem de propheta

et lex peribit a sacerdote et consilium a senioribus

₂₇rex lugebit et princeps induetur maerore

et manus populi terrae conturbabuntur

secundum viam eorum faciam eis

et secundum iudicia eorum iudicabo eos

et scient quia ego Dominus