HIEZECHIEL PROPHETA 14

₁et venerunt ad me viri seniorum Israhel et sederunt coram me

₂et factus est sermo Domini ad me dicens

₃fili hominis viri isti posuerunt inmunditias suas in cordibus suis

et scandalum iniquitatis suae statuerunt contra faciem suam

numquid interrogatus respondebo eis

₄propter hoc loquere eis et dices ad eos haec dicit Dominus Deus

homo homo de domo Israhel

qui posuerit inmunditias suas in corde suo

et scandalum iniquitatis suae statuerit contra faciem suam

et venerit ad prophetam interrogans per eum me

ego Dominus respondebo ei in multitudine inmunditiarum suarum

₅ut capiatur domus Israhel in corde suo

quo recesserunt a me in cunctis idolis suis

₆propterea dic ad domum Israhel haec dicit Dominus Deus

convertimini et recedite ab idolis vestris

et ab universis contaminationibus vestris avertite facies vestras

₇quia homo homo de domo Israhel et de proselytis

quicumque advena fuerit in Israhel

si alienatus fuerit a me et posuerit idola sua in corde suo

et scandalum iniquitatis suae statuerit contra faciem suam

et venerit ad prophetam ut interroget per eum me

ego Dominus respondebo ei per me

₈et ponam faciem meam super hominem illum

et faciam eum in exemplum et in proverbium

et disperdam eum de medio populi mei

et scietis quia ego Dominus

₉et propheta cum erraverit et locutus fuerit verbum

ego Dominus decepi prophetam illum

et extendam manum meam super eum

et delebo eum de medio populi mei Israhel

₁₀et portabunt iniquitatem suam

iuxta iniquitatem interrogantis sic iniquitas prophetae erit

₁₁ut non erret ultra domus Israhel a me

neque polluatur in universis praevaricationibus suis

sed sit mihi in populum et ego sim eis in Deum

ait Dominus exercituum

₁₂et factus est sermo Domini ad me dicens

₁₃fili hominis terra cum peccaverit mihi ut praevaricetur praevaricans

extendam manum meam super eam et conteram virgam panis eius

et inmittam in eam famem

et interficiam de ea hominem et iumentum

₁₄et si fuerint tres viri isti in medio eius Noe Danihel et Iob

ipsi iustitia sua liberabunt animas suas ait Dominus exercituum

₁₅quod si et bestias pessimas induxero super terram ut vastem eam

et fuerit invia eo quod non sit pertransiens propter bestias

₁₆tres viri isti qui fuerint in ea

vivo ego dicit Dominus Deus quia nec filios nec filias liberabunt

sed ipsi soli liberabuntur

terra autem desolabitur

₁₇vel si gladium induxero super terram illam

et dixero gladio transi per terram

et interfecero de ea hominem et iumentum

₁₈et tres viri isti fuerint in medio eius

vivo ego dicit Dominus Deus

non liberabunt filios neque filias

sed ipsi soli liberabuntur

₁₉si autem et pestilentiam inmisero super terram illam

et effudero indignationem meam super eam in sanguine

ut auferam ex ea hominem et iumentum

₂₀et Noe et Danihel et Iob fuerint in medio eius

vivo ego dicit Dominus Deus

quia filium et filiam non liberabunt

sed ipsi iustitia sua liberabunt animas suas

₂₁quoniam haec dicit Dominus Deus

quod si et quattuor iudicia mea pessima

gladium et famem et bestias malas et pestilentiam

misero in Hierusalem

ut interficiam de ea hominem et pecus

₂₂tamen relinquetur in ea salvatio educentium filios et filias

ecce ipsi egredientur ad vos

et videbitis viam eorum et adinventiones eorum

et consolabimini super malo quod induxi in Hierusalem

in omnibus quae inportavi super eam

₂₃et consolabuntur vos

cum videritis viam eorum et adinventiones eorum

et cognoscetis quod non frustra fecerim omnia quae feci in ea

ait Dominus Deus