HIEZECHIEL PROPHETA 13

₁et factus est sermo Domini ad me dicens

₂fili hominis vaticinare ad prophetas Israhel qui prophetant

et dices prophetantibus de corde suo audite verbum Domini

₃haec dicit Dominus Deus vae prophetis insipientibus

qui sequuntur spiritum suum et nihil vident

₄quasi vulpes in desertis prophetae tui Israhel erant

₅non ascendistis ex adverso

neque opposuistis murum pro domo Israhel

ut staretis in proelio in die Domini

₆vident vana et divinant mendacium

dicentes ait Dominus cum Dominus non miserit eos

et perseveraverunt confirmare sermonem

₇numquid non visionem cassam vidistis

et divinationem mendacem locuti estis

et dicitis ait Dominus cum ego non sim locutus

₈propterea haec dicit Dominus Deus

quia locuti estis vana et vidistis mendacium

ideo ecce ego ad vos ait Dominus Deus

₉et erit manus mea super prophetas

qui vident vana et divinant mendacium

in concilio populi mei non erunt

et in scriptura domus Israhel non scribentur

nec in terra Israhel ingredientur

et scietis quia ego Dominus Deus

₁₀eo quod deceperint populum meum dicentes pax et non est pax

et ipse aedificabat parietem

illi autem liniebant eum luto absque paleis

₁₁dic ad eos qui liniunt absque temperatura

quod casurus sit

erit enim imber inundans

et dabo lapides praegrandes desuper inruentes

et ventum procellae dissipantem

₁₂siquidem ecce cecidit paries

numquid non dicetur vobis

ubi est litura quam levistis

₁₃propterea haec dicit Dominus Deus

et erumpere faciam spiritum tempestatum in indignatione mea

et imber inundans in furore meo erit

et lapides grandes in ira in consummationem

₁₄et destruam parietem

quem levistis absque

temperamento

et adaequabo eum terrae et revelabitur fundamentum eius

et cadet et consumetur in medio eius

et scietis quia ego sum Dominus

₁₅et conplebo indignationem meam in parietem

et in his qui linunt eum

absque temperamento

dicamque vobis non est paries

et non sunt qui linunt eum

₁₆prophetae Israhel qui prophetant ad Hierusalem

et vident ei visionem pacis et non est pax ait Dominus Deus

₁₇et tu fili hominis pone faciem tuam contra filias populi tui

quae prophetant de corde suo

et vaticinare super eas

₁₈et dic

haec ait Dominus Deus

vae quae consuunt pulvillos sub omni cubito

manus

et faciunt cervicalia sub capite universae aetatis

ad capiendas animas

cum caperent animas populi mei vivificabant animas eorum

₁₉et violabant me ad populum meum

propter pugillum hordei et fragmen panis

ut interficerent animas quae non moriuntur

et vivificarent animas quae non vivunt

mentientes populo meo credenti mendaciis

₂₀propter hoc haec dicit Dominus Deus

ecce ego ad pulvillos vestros quibus vos capitis animas volantes

et disrumpam eos de brachiis vestris

et dimittam animas quas vos capitis animas ad volandum

₂₁et disrumpam cervicalia vestra

et liberabo populum meum de manu vestra

neque erunt ultra in manibus vestris ad praedandum

et scietis quia ego Dominus

₂₂pro eo quod maerere fecistis cor iusti mendaciter

quem ego non contristavi

et confortastis manus impii

ut non reverteretur a via sua mala et viveret

₂₃propterea vana non videbitis

et divinationes non divinabitis amplius

et eruam populum meum de manu vestra

et scietis quoniam ego Dominus