HIEZECHIEL PROPHETA 15

₁et factus est sermo Domini ad me dicens

₂fili hominis quid fiet ligno vitis

ex omnibus lignis nemorum quae sunt inter ligna silvarum

₃numquid tolletur de ea lignum ut fiat opus

aut fabricabitur de ea paxillus

ut dependeat in eo quodcumque vas

₄ecce igni datum est in escam

utramque partem eius consumpsit ignis

et medietas eius redacta est in favillam

numquid utile erit ad opus

₅etiam cum esset integrum non erat aptum ad opus

quanto magis cum ignis illud devoraverit et conbuserit

nihil ex eo fiet operis

₆propterea haec dicit Dominus Deus

quomodo lignum vitis inter ligna silvarum

quod dedi igni ad devorandum

sic tradidi habitatores Hierusalem

₇et ponam faciem meam in eos

de igne egredientur et ignis consumet eos

et scietis quia ego Dominus cum posuero faciem meam in eos

₈et dedero terram inviam et desolatam

eo quod praevaricatores extiterint dicit Dominus Deus