HIEZECHIEL PROPHETA 1

₁Et factum est in tricesimo anno

in quarto in quinta mensis

cum essem in medio captivorum iuxta fluvium Chobar

aperti sunt caeli et vidi visiones Dei

₂in quinta mensis

ipse est annus quintus transmigrationis regis Ioachin

₃factum est verbum Domini ad Hiezechiel filium Buzi

sacerdotem

in terra Chaldeorum secus flumen Chobar

et facta est super eum ibi manus Domini

₄et vidi et ecce ventus turbinis veniebat ab aquilone et nubes magna

et ignis involvens et splendor in circuitu eius

et de medio eius quasi species electri id est de medio ignis

₅et ex medio eorum similitudo quattuor animalium

et hic aspectus eorum similitudo hominis in eis

₆et quattuor facies uni et quattuor pinnae uni

₇et pedes eorum pedes recti

et planta pedis eorum quasi planta pedis vituli

et scintillae quasi aspectus aeris candentis

₈et manus hominis sub pinnis eorum in quattuor partibus

et facies et pinnas per quattuor partes habebant

₉iunctaeque erant pinnae eorum alterius ad alterum

non revertebantur cum incederent

sed unumquodque ante faciem suam gradiebatur

₁₀similitudo autem vultus eorum

facies hominis et facies leonis a dextris ipsorum quattuor

facies autem bovis a sinistris ipsorum quattuor

et facies aquilae ipsorum quattuor

₁₁et facies eorum et pinnae eorum extentae desuper

duae pinnae singulorum iungebantur

et duae tegebant corpora eorum

₁₂et unumquodque coram facie sua ambulabat

ubi erat impetus spiritus illuc gradiebantur

nec revertebantur cum ambularent

₁₃et similitudo animalium aspectus eorum quasi carbonum ignis ardentium

et quasi aspectus lampadarum

haec erat visio discurrens in medio animalium

splendor ignis et de igne fulgor egrediens

₁₄et animalia ibant et revertebantur in similitudinem fulguris coruscantis

₁₅cumque aspicerem animalia

apparuit rota una super terram iuxta animalia

habens quattuor facies

₁₆et aspectus rotarum et opus earum quasi visio maris

et una similitudo ipsarum quattuor

et aspectus earum et opera quasi sit rota in medio rotae

₁₇per quattuor partes earum euntes ibant

et non revertebantur cum ambularent

₁₈statura quoque erat rotis et altitudo et horribilis aspectus

et totum corpus plenum oculis in circuitu ipsarum quattuor

₁₉cumque ambularent animalia ambulabant pariter et rotae iuxta ea

et cum elevarentur animalia de terra elevabantur simul et rotae

₂₀quocumque ibat spiritus

illuc eunte spiritu et rotae pariter levabantur

sequentes eum

spiritus enim vitae erat in rotis

₂₁cum euntibus ibant et cum stantibus stabant

et cum elevatis a terra pariter elevabantur et rotae sequentes ea

quia spiritus vitae erat in rotis

₂₂et similitudo super caput animalium firmamenti

quasi aspectus cristalli horribilis et extenti super

capita eorum desuper

₂₃sub firmamento autem pinnae eorum rectae alterius ad alterum

unumquodque duabus alis velabat corpus suum

et alterum similiter velabatur

₂₄et audiebam sonum alarum quasi sonum aquarum multarum

quasi sonum sublimis Dei

cum ambularent quasi sonus erat multitudinis ut sonus castrorum

cumque starent dimittebantur pinnae eorum

₂₅nam cum fieret vox supra firmamentum

quod erat super caput eorum

stabant et submittebant alas suas

₂₆et super firmamentum quod erat inminens capiti eorum

quasi aspectus lapidis sapphyri similitudo throni

et super similitudinem throni similitudo quasi aspectus hominis desuper

₂₇et vidi quasi speciem electri

velut aspectum ignis intrinsecus eius per circuitum

a lumbis eius et desuper

et a lumbis eius usque deorsum

vidi quasi speciem ignis splendentis in circuitu

₂₈velut aspectum arcus cum fuerit in nube in die pluviae

hic erat aspectus splendoris per gyrum