LIBER BARUCH 6

₁propter peccata quae peccastis ante Deum

abducemini in Babyloniam captivi a Nabuchodonosor rege Babylonum

₂ingressi itaque in Babyloniam

eritis illic annis plurimis et tempus longum

usque ad generationes septem

post hoc autem educam vos inde cum pace

₃nunc autem videbitis in Babylonia deos aureos et argenteos et lapideos

et ligneos in umeros portari

ostentantes metum gentibus

₄videte ergo ne et vos similes efficiamini factis alienis

et metuatis et metus vos capiat in ipsis

₅visa itaque turba de retro et ab ante adorantes

dicite in cordibus vestris tibi oportet adorari Domine

₆angelus autem meus vobiscum est

ipse autem exquiram animas vestras

₇nam lingua ipsorum polita a fabro

ipsa etiam inaurata et inargentata falsa sunt et non possunt loqui

₈et sicut virgini amanti ornamenti ita

accepto auro fabricati sunt

₉coronas certe habent aureas super capita sua dii illorum

unde subtrahent sacerdotes ab eis aurum et argentum

et erogant illud in semet ipsis

₁₀dant autem et ex ipso prostitutis et meretrices ornant

et iterum cum receperint illud a meretricibus ornant deos suos

₁₁hii autem non liberantur ab erugine et tinea

₁₂opertis autem illis veste purpurea

extergent faciem ipsorum propter pulverem domus

qui est plurimus inter eos

₁₃sceptrum autem habet ut homo sicut iudex regionis

qui in se peccantem non interficit

₁₄habet etiam gladium in manu et securem

se autem de bello et a latronibus non liberat

unde vobis notum sit quia non sunt dii

₁₅ne ergo timueritis eos

sicut enim vas hominis confractum inutile efficitur

tales sunt et dii illorum

₁₆constitutis illis in domo

oculi eorum pleni sunt pulvere a pedibus introeuntium

₁₇et sicut alicui qui regem offendit circumseptae sunt ianuae

aut sicut ad sepulchrum adductum mortuum

ita tutant sacerdotes ostia clusuris et seris

ne a latronibus expolientur

₁₈lucernas accendunt illis et quidem multas

ex quibus nullam videre possunt

sunt autem sicut trabes in domo

₁₉corda vero eorum dicunt elingere serpentes qui de terra sunt

dum comedent eos et vestimentum ipsorum et non sentiunt

₂₀nigrae fiunt facies eorum a fumo qui in domo fit

₂₁supra corpus eorum et supra caput

volant noctuae et hirundines et aves etiam similiter et cattae

₂₂unde scietis quia non sunt dii ne ergo timueritis eos

₂₃aurum etiam quod habent ad speciem est

nisi aliquis exterserit eruginem non fulgebunt

neque enim dum conflarentur sentiebant

₂₄ex omni pretio empta sunt

in quibus spiritus non est in ipsis

₂₅sine pedibus in umeris portantur

ostentantes ignobilitatem suam hominibus

confundantur etiam qui colunt ea

₂₆propterea si ceciderint in terram a semet ipsis non surgent

neque si quis eum statuerit rectum per semet ipsum stabit

sed sicut mortuis munera eorum illis adponentur

₂₇hostias illorum sacerdotes ipsorum vendunt et abutuntur

similiter et mulieres eorum decerpentes

neque infirmo neque mendicanti aliquid inpertiunt

₂₈de sacrificiis eorum fetae et menstruatae contingunt

scientes itaque ex his quia non sunt dii ne timeatis eos

₂₉unde enim vocantur dii

quia mulieres adponunt diis argenteis et aureis et ligneis

₃₀et in domibus eorum sacerdotes sedent

habentes tunicas scissas et capita et barbas rasa

quorum capita nuda sunt

₃₁rugiunt autem clamantes contra deos suos sicut in cena mortui

₃₂a vestimento eorum auferent sacerdotes

et vestiunt uxores suas et filios suos

₃₃neque si quid mali patiantur ab aliquo

neque si quid bonum poterunt retribuere

neque regem constituere possunt neque auferre

₃₄similiter neque divitias dare possunt neque malum

retribuere

si quis illis votum voverit et non reddiderit

nec hoc requirent

₃₅hominem a morte non liberant

neque infimum a potentiore eripient

₃₆hominem caecum ad visum non restituent

de necessitate hominem non liberabunt

₃₇viduae non miserebuntur neque orfanis benefacient

₃₈lapidibus de monte similes sunt dii illorum

lignei et lapidei aurei et argentei

qui autem colunt illa confundentur

₃₉quomodo ergo aestimandum est aut dicendum illos esse deos

₄₀adhuc enim ipsis Chaldeis non honorantibus ea

qui cum audierint mutum non posse loqui

offerent illum ad Bel postulantes ab eo loqui

₄₁quasi possint sentire qui non habent motum

et ipsi cum intellexerint relinquent ea

sensum enim non habent ipsi dii illorum

₄₂mulieres autem circumdatis funibus in viis sedent

succendentes ossa olivarum

₄₃cum autem aliqua ex ipsis adtracta ab aliquo transeunte dormierit

proximae suae exprobrat quod ea non sit digna habita sicut ipsa

neque funis eius disruptus sit

₄₄omnia autem quae illis fiunt falsa sunt

quomodo ergo aestimandum aut dicendum est

esse illos deos

₄₅a fabris autem et ab aurificibus facta sunt

nihil aliud erint nisi id quod volunt esse sacerdotes

₄₆aurifices ipsi etiam qui ea

faciunt

non sunt multi temporis

numquid ergo possunt quae ab ipsis fabricata sunt esse dii

₄₇reliquerunt autem falsa et obprobrium postea futuris

₄₈nam cum supervenerit illis proelium et mala

cogitant post se sacerdotes

ubi se abscondant cum illis

₄₉quomodo ergo sentiri debeant quoniam dii sunt

qui nec de bello se liberant neque de malis se eripiunt

₅₀nam cum sint lignea et inaurata et inargentata

scietur postea quia falsa sunt gentibus universis et regibus

quae manifestata sunt quia non sunt dii

sed opera manuum hominum

et nullum opus Dei in illis

₅₁unde ergo notum est quia non sunt dii sed opera manuum hominum

et nullum Dei opus in ipsis est

₅₂regem regioni non suscitant neque pluviam hominibus dabunt

₅₃iudicium quoque non discernent

neque regionem liberabunt ab iniuria

quia nihil possunt sicut corniculae inter medium caeli et terrae

₅₄etenim cum inciderit ignis in domum deorum ligneorum aureorum et

argenteorum

sacerdotes quidem ipsorum fugient et liberabuntur

ipsi vero sicut trabes in medio conburentur

₅₅regi autem et bello non resistent

quomodo ergo aestimandum est aut recipiendum quia dii sunt

₅₆non a furibus neque a latronibus se liberabunt

dii lignei et lapidei et inaurati et argentati

quibus hii qui fortiores sunt

₅₇aurum et argentum et vestimentum quod operti sunt

auferent illis et abibunt

nec sibi auxilium ferunt

₅₈itaque melius est esse regem ostentantem virtutem suam

aut vas in domo utile in quo gloriabitur qui possidet illud

quam falsi dii

vel ostium in domo quod custodit quae in ipsa sunt

quam falsi dii

₅₉sol quidem et luna

sidera cum sint splendida et emissa ad utilitates obaudiunt

₆₀similiter et fulgur cum apparuerit perspicuum est

id ipsum autem et spiritus in omni regione spirat

₆₁et nubes quibus cum imperatum fuerit a Deo perambulare universum orbem

perficiunt quod imperatum est eis

₆₂ignis etiam missus desuper ut consumat montes et silvas

facit quod praeceptum est ei

haec autem neque speciebus neque virtutibus uni eorum similia sunt

₆₃unde neque aestimandum est neque dicendum

esse illos deos

quando non possint neque iudicium iudicare

neque benefacere hominibus

₆₄scientes itaque quia non sunt dii ne ergo timueritis eos

₆₅neque enim regibus maledicent neque benedicent

₆₆signa etiam in caelo gentibus non ostendunt

neque ut sol lucebunt neque inluminabunt ut luna

₆₇bestiae meliores sunt illis

quae possunt fugere sub tectum ac prodesse sibi

₆₈nullo itaque modo nobis est manifestum quia sunt dii

propter quod ne timeatis eos

₆₉nam sicut in cucumeraria formido nihil custodit

ita sunt dii illorum lignei et argentei et inaurati

₇₀eodem modo et in horto spina alba supra quam omnis avis sedet

similiter et mortuo proiecto in tenebris

similes sunt dii illorum lignei et inaurati et inargentati

₇₁a purpura quoque et marmore quae supra illud

tineant

scietis itaque quia non sunt dii

ipsi etiam postremo comeduntur

et erit obprobrium in regione

₇₂melior est homo iustus qui non habet simulacra

nam erit longe ab obprobriis