LIBER EXODI 9

₁dixit autem Dominus ad Mosen

ingredere ad Pharaonem et loquere ad eum

haec dicit Dominus Deus Hebraeorum

dimitte populum meum ut sacrificet mihi

₂quod si adhuc rennuis et retines eos

₃ecce manus mea erit super agros tuos

et super equos et asinos et camelos et boves et oves

pestis valde gravis

₄et faciet Dominus mirabile

inter possessiones Israhel et possessiones Aegyptiorum

ut nihil omnino intereat ex his quae pertinent

ad filios Israhel

₅constituitque Dominus tempus dicens

cras faciet Dominus verbum istud in terra

₆fecit ergo Dominus verbum hoc altero die

mortuaque sunt omnia animantia Aegyptiorum

de animalibus vero filiorum Israhel nihil omnino periit

₇et misit Pharao ad videndum

nec erat quicquam mortuum de his quae possidebat Israhel

ingravatumque est cor Pharaonis et non dimisit populum

₈et dixit Dominus ad Mosen et Aaron

tollite plenas manus cineris de camino

et spargat illud Moses in caelum coram Pharao

₉sitque pulvis super omnem terram Aegypti

erunt enim in hominibus et in iumentis

vulnera et vesicae turgentes

in universa terra Aegypti

₁₀tuleruntque cinerem de camino

et steterunt contra Pharao

et sparsit illud Moses in caelum

factaque sunt vulnera vesicarum turgentium

in hominibus et in iumentis

₁₁nec poterant malefici stare coram Mosen

propter vulnera quae in illis erant et in omni terra Aegypti

₁₂induravitque Dominus cor Pharaonis

et non audivit eos sicut locutus est Dominus ad Mosen

₁₃dixit quoque Dominus ad Mosen

mane consurge et sta coram Pharao

et dices ad eum haec dicit Dominus Deus Hebraeorum

dimitte populum meum ut sacrificet mihi

₁₄quia in hac vice mittam omnes plagas meas super cor tuum

super servos tuos et super populum tuum

ut scias quod non sit similis mei in omni terra

₁₅nunc enim extendens manum

percutiam te et populum tuum peste

peribisque de terra

₁₆idcirco autem posui te ut ostendam in te fortitudinem meam

et narretur nomen meum in omni terra

₁₇adhuc retines populum meum et non vis eum dimittere

₁₈en pluam hac ipsa hora cras grandinem multam nimis

qualis non fuit in Aegypto

a die qua fundata est usque in praesens tempus

₁₉mitte ergo iam nunc

et congrega iumenta tua et omnia quae habes in agro

homines enim et iumenta et universa quae inventa fuerint foris

nec congregata de agris

cecideritque super ea grando morientur

₂₀qui timuit verbum Domini de servis Pharao

fecit confugere servos suos et iumenta in domos

₂₁qui autem neglexit sermonem Domini

dimisit servos suos et iumenta in agris

₂₂et dixit Dominus ad Mosen extende manum tuam in caelum

ut fiat grando in universa terra Aegypti

super homines et super iumenta

et super omnem herbam agri in terra Aegypti

₂₃extenditque Moses virgam in caelum

et Dominus dedit tonitrua et grandinem

ac discurrentia fulgura super terram

pluitque Dominus grandinem super terram Aegypti

₂₄et grando et ignis inmixta pariter

ferebantur

tantaeque fuit magnitudinis

quanta ante numquam apparuit in universa terra Aegypti

ex quo gens illa condita est

₂₅et percussit grando in omni terra Aegypti

cuncta quae fuerunt in agris ab homine usque ad iumentum

cunctam herbam agri percussit grando

et omne lignum regionis confregit

₂₆tantum in terra Gessen ubi erant filii Israhel grando non cecidit

₂₇misitque Pharao et vocavit Mosen et Aaron dicens ad eos

peccavi etiam nunc

Dominus iustus ego et populus meus impii

₂₈orate Dominum et desinant tonitrua Dei et grando

ut dimittam vos et nequaquam hic ultra maneatis

₂₉ait Moses cum egressus fuero de urbe

extendam palmas meas ad Dominum

et cessabunt tonitrua et grando non erit

ut scias quia Domini est terra

₃₀novi autem quod et tu et servi tui necdum timeatis Dominum Deum

₃₁linum ergo et hordeum laesum est

eo quod hordeum esset virens et linum iam folliculos germinaret

₃₂triticum autem et far non sunt laesa quia serotina erant

₃₃egressusque Moses a Pharaone et ex urbe

tetendit manus ad Dominum

et cessaverunt tonitrua et grando

nec ultra stillavit pluvia super terram

₃₄videns autem Pharao quod cessasset pluvia et grando et tonitrua

auxit peccatum

₃₅et ingravatum est cor eius et servorum illius

et induratum nimis

nec dimisit filios Israhel

sicut praeceperat Dominus per manum Mosi