LIBER EXODI 30

₁facies quoque altare in adolendum thymiama de lignis setthim

₂habens cubitum longitudinis et alterum latitudinis

id est quadrangulum

et duos cubitos in altitudine

cornua ex ipso procedent

₃vestiesque illud auro purissimo

tam craticulam eius quam parietes per circuitum et cornua

faciesque ei coronam aureolam per gyrum

₄et duos anulos aureos sub corona per singula latera

ut mittantur in eos vectes et altare portetur

₅ipsos quoque vectes facies de lignis setthim et inaurabis

₆ponesque altare contra velum quod ante arcam pendet testimonii

coram propitiatorio quo tegitur testimonium ubi loquar tibi

₇et adolebit incensum super eo Aaron suave fraglans mane

quando conponet lucernas incendet illud

₈et quando conlocat eas ad vesperum

uret thymiama sempiternum coram Domino in generationes vestras

₉non offeretis super eo thymiama conpositionis alterius

nec oblationem et victimam nec liba libabitis

₁₀et deprecabitur Aaron super cornua eius semel per annum

in sanguine quod oblatum est pro peccato

et placabit super eo in generationibus vestris

sanctum sanctorum erit Domino

₁₁locutusque est Dominus ad Mosen dicens

₁₂quando tuleris summam filiorum Israhel

iuxta numerum dabunt singuli pretium pro animabus suis Domino

et non erit plaga in eis cum fuerint recensiti

₁₃hoc autem dabit omnis qui transit ad nomen

dimidium sicli iuxta mensuram templi

siclus viginti obolos habet

media pars sicli offeretur Domino

₁₄qui habetur in numero a viginti annis et supra dabit pretium

₁₅dives non addet ad medium sicli et pauper nihil minuet

₁₆susceptamque pecuniam quae conlata est a filiis Israhel

trades in usus tabernaculi testimonii

ut sit monumentum eorum coram Domino

et propitietur animabus illorum

₁₇locutusque est Dominus ad Mosen dicens

₁₈facies et labium aeneum cum basi sua ad lavandum

ponesque illud inter tabernaculum testimonii et altare

et missa aqua

₁₉lavabunt in eo Aaron et filii eius manus suas ac pedes

₂₀quando ingressuri sunt tabernaculum testimonii

et quando accessuri ad altare

ut offerant in eo thymiama Domino

₂₁ne forte moriantur

legitimum sempiternum erit ipsi et semini eius per successiones

₂₂locutusque est Dominus ad Mosen

₂₃dicens

sume tibi aromata prima

et zmyrnae electae

quingentos siclos

et cinnamomi medium id est ducentos quinquaginta

calami similiter ducentos quinquaginta

₂₄cassiae autem quingentos siclos in pondere sanctuarii

olei de olivetis mensuram hin

₂₅faciesque unctionis oleum sanctum

unguentum conpositum opere unguentarii

₂₆et ungues ex eo tabernaculum testimonii et arcam testamenti

₂₇mensamque cum vasis suis

candelabrum et utensilia eius

altaria thymiamatis

₂₈et holocausti

et universam supellectilem quae ad cultum eorum pertinent

₂₉sanctificabisque omnia et erunt sancta sanctorum

qui tetigerit ea sanctificabitur

₃₀Aaron et filios eius ungues

sanctificabisque eos ut sacerdotio fungantur mihi

₃₁filiis quoque Israhel dices

hoc oleum unctionis sanctum erit mihi in generationes vestras

₃₂caro hominis non unguetur ex eo

et iuxta conpositionem eius non facietis aliud

quia sanctificatum est et sanctum erit vobis

₃₃homo quicumque tale conposuerit et dederit ex eo alieno

exterminabitur de populo suo

₃₄dixitque Dominus ad Mosen

sume tibi aromata stacten et onycha

galbanen boni odoris et tus lucidissimum

aequalis ponderis erunt omnia

₃₅faciesque thymiama conpositum opere unguentarii

mixtum diligenter et purum et sanctificatione dignissimum

₃₆cumque in tenuissimum pulverem universa contuderis

pones ex eo coram testimonio tabernaculi

in quo loco apparebo tibi

sanctum sanctorum erit vobis thymiama

₃₇talem conpositionem non facietis in usus vestros

quia sanctum est Domino

₃₈homo quicumque fecerit simile ut odore illius perfruatur

peribit de populis suis