LIBER EXODI 29

₁sed et hoc facies ut mihi in sacerdotio consecrentur

tolle vitulum de armento et arietes duos inmaculatos

₂panesque azymos et crustula absque fermento

quae conspersa sint oleo

lagana quoque azyma oleo lita

de simila triticea cuncta facies

₃et posita in canistro offeres

vitulum autem et duos arietes

₄et Aaron ac filios eius adplicabis ad ostium tabernaculi testimonii

cumque laveris patrem cum filiis aqua

₅indues Aaron vestimentis suis

id est linea et tunica et superumerali et rationali quod constringes

balteo

₆et pones tiaram in capite eius et lamminam sanctam super tiaram

₇et oleum unctionis fundes super caput eius

atque hoc ritu consecrabitur

₈filios quoque illius adplicabis

et indues tunicis lineis cingesque balteo

₉Aaron scilicet et liberos eius

et inpones eis mitras

eruntque sacerdotes mei in religione perpetua

postquam initiaveris manus eorum

₁₀adplicabis et vitulum coram tabernaculo testimonii

inponentque Aaron et filii eius manus super caput illius

₁₁et mactabis eum in conspectu Domini

iuxta ostium tabernaculi testimonii

₁₂sumptumque de sanguine vituli

pones super cornua altaris digito tuo

reliquum autem sanguinem fundes iuxta basim eius

₁₃sumes et adipem totum qui operit intestina

et reticulum iecoris ac duos renes et adipem qui super eos est

et offeres incensum super altare

₁₄carnes vero vituli et corium et fimum conbures foris extra castra

eo quod pro peccato sit

₁₅unum quoque arietum sumes

super cuius caput ponent Aaron et filii eius manus

₁₆quem cum mactaveris tolles de sanguine eius et fundes circa altare

₁₇ipsum autem arietem secabis in frusta

lotaque intestina eius ac pedes

pones super concisas carnes et super caput illius

₁₈et offeres totum arietem in incensum super altare

oblatio est Domini odor suavissimus victimae

Dei

₁₉tolles quoque arietem alterum

super cuius caput Aaron et filii eius ponent manus

₂₀quem cum immolaveris sumes de sanguine ipsius

et pones super extremum dextrae auriculae Aaron et

filiorum eius

et super pollices manus eorum et pedis dextri

fundesque sanguinem super altare per circuitum

₂₁cumque tuleris de sanguine qui est super altare et de oleo unctionis

asperges Aaron et vestes eius filios et vestimenta eorum

consecratisque et ipsis et vestibus

₂₂tolles adipem de ariete et caudam

et arvinam quae operit vitalia ac reticulum iecoris

et duos renes atque adipem qui super eos est armumque dextrum

eo quod sit aries consecrationum

₂₃tortam panis unius

crustulum conspersum oleo

laganum de canistro azymorum quod positum est in conspectu

Domini

₂₄ponesque omnia super manus Aaron et filiorum eius

et sanctificabis eos elevans coram Domino

₂₅suscipiesque universa de manibus eorum

et incendes super altare in holocaustum

odorem suavissimum in conspectu Domini quia oblatio eius est

₂₆sumes quoque pectusculum de ariete quo initiatus est Aaron

sanctificabisque illud elatum coram

Domino

et cedet in partem tuam

₂₇sanctificabis et pectusculum consecratum

et armum quem de ariete separasti

₂₈quo initiatus est Aaron et filii eius

cedentque in partem Aaron et filiorum eius

iure perpetuo a filiis Israhel quia primitiva sunt et initia

de victimis eorum pacificis quae offerunt Domino

₂₉vestem autem sanctam qua utitur Aaron habebunt filii

eius post eum

ut unguantur in ea et consecrentur manus eorum

₃₀septem diebus utetur illa

qui pontifex pro eo fuerit constitutus de filiis eius

et qui ingredietur tabernaculum testimonii ut ministret in sanctuario

₃₁arietem autem consecrationum tolles

et coques carnes eius in loco sancto

₃₂quibus vescetur Aaron et filii eius

panes quoque qui sunt in canistro

in vestibulo tabernaculi testimonii comedent

₃₃ut sit placabile sacrificium et sanctificentur offerentium manus

alienigena non vescetur ex eis quia sancti sunt

₃₄quod si remanserit de carnibus consecratis

sive de panibus usque mane

conbures reliquias igni non comedentur quia sanctificata sunt

₃₅omnia quae praecepi tibi facies super Aaron et filiis eius

septem diebus consecrabis manus eorum

₃₆et vitulum pro peccato offeres per singulos dies ad expiandum

mundabisque altare cum immolaris expiationis hostiam

et ungues illud in sanctificationem

₃₇septem diebus expiabis altare et sanctificabis

et erit sanctum sanctorum omnis qui tetigerit illud sanctificabitur

₃₈hoc est quod facies in altari

agnos anniculos duos per singulos dies iugiter

₃₉unum agnum mane et alterum vespere

₄₀decimam partem similae conspersae oleo tunso

quod habeat mensuram quartam partem hin

et vinum ad libandum eiusdem mensurae in agno uno

₄₁alterum vero agnum offeres ad vesperam

iuxta ritum matutinae oblationis et iuxta ea quae diximus

in odorem suavitatis

₄₂sacrificium Domino

oblatione perpetua in generationes vestras

ad ostium tabernaculi testimonii coram Domino

ubi constituam ut loquar ad te

₄₃ibique praecipiam filiis Israhel

et sanctificabitur altare in gloria mea

₄₄sanctificabo et tabernaculum testimonii cum altari

et Aaron cum filiis eius ut sacerdotio fungantur mihi

₄₅et habitabo in medio filiorum Israhel

eroque eis Deus

₄₆et scient quia ego Dominus Deus eorum

qui eduxi eos de terra Aegypti

ut manerem inter illos ego Dominus Deus ipsorum