LIBER EXODI 28

₁adplica quoque ad te Aaron fratrem tuum

cum filiis suis de medio filiorum Israhel

ut sacerdotio fungantur mihi

Aaron Nadab et Abiu Eleazar et Ithamar

₂faciesque vestem sanctam fratri tuo in gloriam et decorem

₃et loqueris cunctis sapientibus corde

quos replevi spiritu prudentiae

ut faciant vestes Aaron in quibus sanctificatus ministret mihi

₄haec autem erunt vestimenta quae facient

rationale et superumerale tunicam et lineam strictam

cidarim et balteum

facient vestimenta sancta Aaron fratri tuo et filiis

eius

ut sacerdotio fungantur mihi

₅accipientque aurum et hyacinthum et purpuram

coccumque bis tinctum et byssum

₆facient autem superumerale de auro et hyacintho ac purpura

coccoque bis tincto et bysso retorta opere polymito

₇duas oras iunctas habebit in utroque latere summitatum

ut in unum redeant

₈ipsaque textura et cuncta operis varietas

erit ex auro et hyacintho et purpura

coccoque bis tincto et bysso retorta

₉sumesque duos lapides onychinos

et sculpes in eis nomina filiorum Israhel

₁₀sex nomina in lapide uno et sex reliqua in altero

iuxta ordinem nativitatis eorum

₁₁opere sculptoris et celatura gemmarii

sculpes eos nominibus filiorum Israhel

inclusos auro atque circumdatos

₁₂et pones in utroque latere superumeralis memoriale filiis Israhel

portabitque Aaron nomina eorum coram Domino

super utrumque umerum ob recordationem

₁₃facies et uncinos ex auro

₁₄et duas catenulas auri purissimi sibi invicem

coherentes

quas inseres uncinis

₁₅rationale quoque iudicii facies opere polymito

iuxta texturam superumeralis

ex auro hyacintho et purpura coccoque bis tincto et bysso retorta

₁₆quadrangulum erit et duplex

mensuram palmi habebit tam in longitudine quam in latitudine

₁₇ponesque in eo quattuor ordines lapidum

in primo versu erit lapis sardius et topazius et zmaragdus

₁₈in secundo carbunculus sapphyrus et iaspis

₁₉in tertio ligyrius achates et amethistus

₂₀in quarto chrysolitus onychinus et berillus

inclusi auro erunt per ordines suos

₂₁habebuntque nomina filiorum Israhel

duodecim nominibus celabuntur

singuli lapides nominibus singulorum per duodecim tribus

₂₂facies in rationali catenas sibi invicem coherentes ex auro purissimo

₂₃et duos anulos aureos quos pones in utraque rationalis summitate

₂₄catenasque aureas iunges anulis qui sunt in marginibus eius

₂₅et ipsarum catenarum extrema duobus copulabis uncinis

in utroque latere superumeralis quod rationale respicit

₂₆facies et duos anulos aureos quos pones in summitatibus rationalis

et in oris quae e regione sunt superumeralis

et posteriora eius aspiciunt

₂₇nec non et alios duos anulos aureos

qui ponendi sunt in utroque latere superumeralis deorsum

quod respicit contra faciem iuncturae inferioris

ut aptari possit cum superumerali

₂₈et stringatur rationale anulis suis cum anulis superumeralis vitta

hyacinthina

ut maneat iunctura fabrefacta

et a se invicem rationale et superumerale nequeant separari

₂₉portabitque Aaron nomina filiorum Israhel

in rationali iudicii super pectus suum

quando ingreditur sanctuarium

memoriale coram Domino in aeternum

₃₀pones autem in rationali iudicii doctrinam et veritatem

quae erunt in pectore Aaron

quando ingreditur coram Domino

et gestabit iudicium filiorum Israhel in pectore suo in

conspectu Domini semper

₃₁facies et tunicam superumeralis totam hyacinthinam

₃₂in cuius medio supra erit capitium

et ora per gyrum eius textilis

sicut fieri solet in extremis vestium partibus

ne facile rumpatur

₃₃deorsum vero ad pedes eiusdem tunicae per circuitum

quasi mala punica facies

ex hyacintho et purpura et cocco bis tincto

mixtis in medio tintinabulis

₃₄ita ut tintinabulum sit aureum et malum

rursumque tintinabulum aliud aureum et malum

punicum

₃₅et vestietur ea Aaron in officio ministerii ut audiatur sonitus

quando ingreditur et egreditur sanctuarium in conspectu Domini

et non moriatur

₃₆facies et lamminam de auro purissimo

in qua sculpes opere celatoris Sanctum Domino

₃₇ligabisque eam vitta hyacinthina

et erit super tiaram

₃₈inminens fronti pontificis

portabitque Aaron iniquitates eorum

quae obtulerint et sanctificaverint filii Israhel

in cunctis muneribus et donariis suis

erit autem lammina semper in fronte eius

ut placatus eis sit Dominus

₃₉stringesque tunicam bysso

et tiaram byssinam facies et balteum opere plumarii

₄₀porro filiis Aaron tunicas lineas parabis

et balteos ac tiaras in gloriam et decorem

₄₁vestiesque his omnibus Aaron fratrem tuum et filios eius cum eo

et cunctorum consecrabis manus

sanctificabisque illos ut sacerdotio fungantur mihi

₄₂facies et feminalia linea ut operiant carnem turpitudinis suae

a renibus usque ad femina

₄₃et utentur eis Aaron et filii eius

quando ingredientur tabernaculum testimonii

vel quando adpropinquant ad altare

ut ministrent in sanctuario

ne iniquitatis rei moriantur

legitimum sempiternum erit Aaron et semini eius post eum