LIBER DEUTERONOMII 25

₁si fuerit causa inter aliquos et interpellaverint iudices

quem iustum esse perspexerint illi iustitiae palmam

dabunt

quem impium condemnabunt impietatis

₂sin autem eum qui peccavit dignum viderint plagis

prosternent et coram se facient verberari

pro mensura peccati erit et plagarum modus

₃ita dumtaxat ut quadragenarium numerum non excedant

ne foede laceratus ante oculos tuos abeat frater tuus

₄non ligabis os bovis terentis in area fruges tuas

₅quando habitaverint fratres simul

et unus ex eis absque liberis mortuus fuerit

uxor defuncti non nubet alteri

sed accipiet eam frater eius et suscitabit semen fratris sui

₆et primogenitum ex ea filium nomine illius appellabit

ut non deleatur nomen eius ex Israhel

₇sin autem noluerit accipere uxorem fratris sui quae ei lege debetur

perget mulier ad portam civitatis

et interpellabit maiores natu dicetque

non vult frater viri mei suscitare nomen fratris sui in

Israhel

nec me in coniugium sumere

₈statimque accersiri eum facient et interrogabunt

si responderit nolo eam uxorem accipere

₉accedet mulier ad eum coram senioribus

et tollet calciamentum de pede eius

spuetque in faciem illius et dicet

sic fit homini qui non aedificat domum

fratris sui

₁₀et vocabitur nomen illius in Israhel domus Disculciati

₁₁si habuerint inter se iurgium viri

et unus contra alterum rixari coeperit

volensque uxor alterius eruere virum suum de manu fortioris

miserit manum et adprehenderit verenda eius

₁₂abscides manum illius nec flecteris super eam ulla misericordia

₁₃non habebis in sacculo diversa pondera maius et minus

₁₄nec erit in domo tua modius maior et minor

₁₅pondus habebis iustum et verum

et modius aequalis et verus erit tibi

ut multo vivas tempore super terram

quam Dominus Deus tuus dederit tibi

₁₆abominatur enim Dominus eum qui facit haec

et aversatur omnem iniustitiam

₁₇memento quae fecerit tibi Amalech in via

quando egrediebaris ex Aegypto

₁₈quomodo occurrerit tibi

et extremos agminis tui qui lassi residebant ceciderit

quando tu eras fame et labore confectus

et non timuerit Deum

₁₉cum ergo Dominus Deus tuus dederit tibi requiem

et subiecerit cunctas per circuitum nationes

in terra quam tibi pollicitus est

delebis nomen eius sub caelo cave ne obliviscaris