AMOS PROPHETA 6

₁vae qui opulenti estis in Sion

et confiditis in monte Samariae

optimates capita populorum

ingredientes pompatice domum Israhel

₂transite in Chalanne et videte et ite inde in Emath magnam

et descendite in Geth Palestinorum

et ad optima quaeque regna horum

si latior terminus eorum termino vestro est

₃qui separati estis in diem malum

et adpropinquatis solio iniquitatis

₄qui dormitis in lectis eburneis et lascivitis in stratis vestris

qui comeditis agnum de grege et vitulos de medio armenti

₅qui canitis ad vocem psalterii sicut David

putaverunt se habere vasa cantici

₆bibentes in fialis vinum et optimo unguento delibuti

et nihil patiebantur super contritione Ioseph

₇quapropter nunc migrabunt in capite transmigrantium

et auferetur factio lascivientium

₈iuravit Dominus Deus in anima sua dicit Dominus Deus exercituum

detestor ego superbiam Iacob

et domos eius odi

et tradam civitatem cum habitatoribus suis

₉quod si reliqui fuerint decem viri in domo una et ipsi morientur

₁₀et tollet eum propinquus suus et conburet eum

ut efferat ossa de domo

et dicet ei qui in penetrabilibus domus est

numquid adhuc est apud te

₁₁et respondebit finis est

et dicet ei tace et non recorderis nominis Domini

₁₂quia ecce Dominus mandabit

et percutiet domum maiorem ruinis

et domum minorem scissionibus

₁₃numquid currere queunt in petris equi

aut arari potest in bubalis

quoniam convertistis in amaritudinem iudicium

et fructum iustitiae in absinthium

₁₄qui laetamini in nihili

qui dicitis numquid non in fortitudine nostra adsumpsimus nobis cornua

₁₅ecce enim suscitabo super vos domus Israhel dicit Dominus Deus

exercituum gentem

et conterent vos ab introitu Emath

usque ad torrentem Deserti