LIBER II MACCHABEORUM 13

₁anno centesimo quadragesimo nono

cognovit Iudas Antiochum Eupatoris venire cum multitudine

adversus Iudaeam

₂et cum eo Lysiam procuratorem et praepositum negotiorum

secum habentem peditum centum decem milia

et equitum quinque milia et elefantos viginti duo

currus cum falcibus trecentos

₃commiscuit autem se illis et Menelaus

et cum multa fallacia deprecabatur Antiochum

non pro patriae salute sed sperans se constitui in principatum

₄sed Rex regum suscitavit animos Antiochi in peccatorem

et suggerente Lysia hunc esse causam omnium malorum

iussit ut eis est consuetudo conprehensum in eodem

loco necari

₅erat autem in eodem loco turris quinquaginta cubitorum

aggestum undique habens cineris

haec prospectum habebat in praeceps

₆inde in cinerem deici iussit sacrilegum

omnibus eum propellentibus ad interitum

₇et tali lege praevaricatorem legis contigit mori

nec terrae dari Menelaum

₈et quidem satis iuste

nam quia multa erga aram Dei delicta commisit

cuius ignis et cinis erat sanctus

ipse in cineris morte damnatus est

₉sed rex mente effrenatus veniebat

nequiorem se Iudaeis ostensurus

₁₀quibus Iudas cognitis praecepit populo

ut die ac nocte Dominum invocarent

quo sicut semper et nunc adiuvaret eos

₁₁quippe qui lege et patria sanctoque templo privari vererentur

ac populum qui nuper paululum respirasset

ne sineret blasphemis rursum nationibus subdi

₁₂omnibus itaque id simul facientibus

et petentibus a Domino misericordiam

cum fletu et ieiuniis per triduum continuum prostratis

hortatus est eos Iudas ut se praepararent

₁₃ipse vero cum senioribus cogitavit

priusquam rex admoveret exercitum ad Iudaeam et obtineret civitatem

exire et Domini iudicio committere exitum rei

₁₄dans itaque potestatem omnium Deo mundi creatori

et hortatus suos ut fortiter dimicarent

et usque ad mortem pro legibus templo civitate patria et

civibus starent

circa Modin exercitum constituit

₁₅et dato signo suis Dei victoria

iuvenibus fortissimis electis nocte adgressus aulam regiam

in castris interfecit viros quattuor milia

et maximum elefantorum cum his qui superpositi erant

₁₆summoque metu ac perturbatione hostium replentes

rebus prospere gestis abierunt

₁₇hoc autem factum est die inlucescente

adiuvante eum Domini protectione

₁₈sed rex accepto gustu audaciae Iudaeorum

arte difficultates locorum temptabat

₁₉et Bethsurae quod erat Iudaeorum praesidium munitum

castra admovebat

sed fugabatur inpingebat minuebatur

₂₀his autem qui intus erant Iudas necessaria mittebat

₂₁enuntiavit autem mysteria hostibus Rhodocus quidam de iudaico exercitu

qui requisitus conprehensus conclusus est

₂₂iterum rex sermonem habuit ad eos qui erant in Bethsuris

dextram dedit accepit abiit

₂₃commisit cum Iuda superatus est

ut autem cognovit rebellasse Philippum Antiochiae

qui relictus erat super negotia

mente consternatus Iudaeos deprecans

subditusque eis iurat de omnibus quibus iustum visum est

et reconciliatus obtulit sacrificium

honorificavit templum et munera posuit

₂₄Macchabeum amplexus est

et fecit eum ab Ptolomaide usque Gerrenos

ducem et principem

₂₅ut autem venit Ptolomaidam

graviter ferebant Ptolomenses amicitiae conventionem

indignantes ne forte foedus inrumperent

₂₆tunc ascendit Lysias tribunal et exposuit rationem

et populum sedavit

regressusque est Antiochiam

et hoc modo regi profectio et reditus processit