LIBER I MACCHABEORUM 5

₁et factum est ut audierunt gentes in circuitu

quia aedificatum est altare et sancta sicut prius

et iratae sunt valde

₂et cogitabant tollere genus Iacob qui erant inter eos

et coeperunt occidere de populo et persequi

₃et debellabat Iudas filios Esau in Idumea

et eos qui erant in Acrabattene

quia circumsedebant Israhelitas

et percussit eos plaga magna

₄et recordatus est malitiam filiorum Bean

qui erant populo in laqueum et in scandalum

insidiantes in via

₅et conclusi sunt ab eo in turribus

et adplicuit ad eos et anathematizavit eos

et incendit turres eorum igni cum omnibus qui in eis erant

₆et transiit ad filios Ammon

et invenit manum fortem et populum copiosum

et Timotheum ducem ipsorum

₇et commisit cum eis proelia multa

et contriti sunt in conspectu eorum et percussit eos

₈et cepit Iazer civitatem et filias eius

et reversus est in Iudaeam

₉et congregatae sunt gentes quae sunt in Galaad

adversus Israhelitas qui erant in finibus eorum

ut tollerent eos

et fugerunt in Datheman munitionem

₁₀et miserunt litteras ad Iudam et fratres eius dicentes

congregatae sunt adversum nos gentes per circuitum

ut auferant nos

₁₁et parant venire et occupare munitionem in quam confugimus

et Timotheus est dux exercitus eorum

₁₂nunc ergo veni eripe nos de manibus eorum

quia cecidit multitudo de nobis

₁₃et omnes fratres nostri qui erant in locis Tubi interfecti sunt

et captivas abduxerunt uxores

eorum et natos et spolia

et peremerunt illic ferme mille viros

₁₄et adhuc epistulae legebantur et ecce alii nuntii venerunt de Galilea

conscissis tunicis nuntiantes secundum verba haec

₁₅dicentes

convenisse adversum se a Ptolomaida et Tyro et

Sidone et omni Galilea alienigenas

ut nos consumant

₁₆ut audivit autem Iudas et populus sermones istos

convenit ecclesia magna cogitare quid facerent fratribus suis

qui in tribulatione erant et expugnabantur ab eis

₁₇dixitque Iudas Simoni fratri suo

elige tibi viros et vade et libera fratres tuos in Galilea

ego enim et frater meus Ionathas ibimus in Galaditin

₁₈et reliquit Iosepphum filium Zacchariae et Azariam duces populi

cum residuo exercitu in Iudaeam ad custodiendum

₁₉et praecepit illi dicens praeesto populo huic

et nolite bellum committere adversus gentes donec revertamur

₂₀et dati sunt Simoni viri tria milia ut iret in Galileam

Iudae autem octo milia in Galaditin

₂₁et abiit Simon in Galileam et commisit proelia multa cum gentibus

et contritae sunt gentes a facie eius

et persecutus est eos usque ad portam

₂₂Ptolomaidis

et ceciderunt de gentibus fere tria milia virorum

et accepit spolia eorum

₂₃et sumpsit eos qui erant in Galilea et

in Arbatis

cum uxoribus et natis et omnibus quae erant illis

et adduxit in Iudaeam cum laetitia magna

₂₄et Iudas Macchabeus et Ionathas et fratres eius

transierunt Iordanem

et abierunt viam trium dierum per desertum

₂₅et occurrerunt eis Nabuthei et susceperunt eos pacifice

et narraverunt eis omnia

quae acciderunt fratribus in Galaditide

₂₆et quia multi ex eis conprehensi sunt in Basara et

Bosor

et in Alimis et in Casfor et Macet et Carnain

hae omnes civitates munitae et magnae

₂₇sed et in ceteris civitatibus Galaditidis tenentur conprehensi

et in crastinum constituerunt admovere exercitum

civitatibus his

et conprehendere et tollere eos in una die

₂₈et convertit Iudas et exercitus eius viam in desertum Bosor repente

et occupavit civitatem et occidit omnem masculum in ore gladii

et accepit omnia spolia eorum et succendit eam igni

₂₉et surrexerunt inde nocte et ibant usque ad munitionem

₃₀et factum est diluculo cum adlevassent oculos suos

ecce populus multus cuius non erat numerus

portantes scalas et machinas

ut conprehenderent munitionem et expugnarent eos

₃₁et vidit Iudas quia coepit bellum

et clamor belli ascendit in caelum sicut tuba

et clamor magnus de civitate

₃₂et exercitui dixit

pugnate hodie pro fratribus vestris

₃₃et venit tribus ordinibus post eos

et exclamaverunt tubis et clamaverunt in oratione

₃₄et cognoverunt castra Timothei quia Macchabeus est

et refugerunt a facie eius et percusserunt eos plaga magna

et ceciderunt ex eis in illa die fere octo milia

virorum

₃₅et divertit Iudas in Maspha

et expugnavit et cepit eam et occidit omnem masculum eius

et sumpsit spolia eius et succendit eam igni

₃₆inde perrexit et cepit Casbon et Maged et Bosor

et reliquas civitates Galaditidis

₃₇post haec autem verba congregavit Timotheus exercitum alium

et castra posuit contra Rafon trans torrentem

₃₈et misit Iudas speculari exercitum et renuntiaverunt ei dicentes

quia convenerunt ad eum omnes gentes quae in circuitu nostro sunt

exercitus multus nimis

₃₉et Arabas conduxit in auxilium

et castra posuerunt trans torrentem

parati venire ad te in proelium

et abiit Iudas obviam illis

₄₀et ait Timotheus principibus exercitus sui

cum adpropiaverit Iudas et exercitus eius ad

torrentem aquae

si transierit ad nos prior

non poterimus sustinere eum quia potens poterit adversum nos

₄₁si vero timuerit transire et posuerit castra extra flumen

transfretemus ad eos et poterimus adversus illum

₄₂ut autem adpropinquavit Iudas ad torrentem aquae

statuit scribas populi secus torrentem et mandavit eis dicens

neminem hominum reliqueritis sed veniant omnes in proelium

₄₃et transfretavit ad illos prior et omnis populus post eum

et contritae sunt ante faciem eorum omnes gentes

et proiecerunt arma sua

et fugerunt ad fanum quod est in Carnain

₄₄et occupavit ipsam civitatem

et fanum succendit igni cum omnibus qui erant in ipso

et oppressa est Carnain

et non potuit sustinere contra faciem Iudae

₄₅et congregavit Iudas universos Israhelitas

qui erant in Galaditiden

a minimo usque ad maximum et uxores eorum et natos

et exercitum magnum valde ut venirent in terram Iudae

₄₆et venerunt usque Efron

et haec civitas magna in ingressu posita munita valde

et non erat declinare ab ea dextra vel sinistra

sed per mediam iter erat

₄₇et incluserunt se qui erant in civitate et obstruxerunt portas lapidibus

et misit ad eos Iudas verbis pacificis

₄₈dicens

transeamus per terram vestram ut eamus in terram nostram

et nemo vobis nocebit

tantum pedibus transibimus

et nolebant eis aperire

₄₉et praecepit Iudas praedicare in castris

ut adplicarent unusquisque in quo erat loco

₅₀et adplicuerunt viri virtutis

et obpugnavit civitatem illam tota die et tota nocte

et tradita est civitas in manu eius

₅₁et peremerunt omnem masculum in ore gladii

et eradicavit eam et accepit spolia eius

et transiit per totam civitatem super interfectos

₅₂et transgressi sunt Iordanem in campo magno contra

Bethsan

₅₃et erat Iudas congregans extremos

et exhortabatur populum per totam viam

donec venerunt in terram Iuda

₅₄et ascenderunt in montem Sion cum laetitia et gaudio

et obtulerunt holocausta quod nemo ex eis cecidisset

donec reverterentur in pace

₅₅et in diebus quibus erat Iudas et Ionathas in terra Galaad

et Simeon frater eius in Galilea contra faciem Ptolomaidis

₅₆audivit Iosepphus Zacchariae filius et Azarias princeps virtutis

res bene gestas et proelia quae facta sunt

₅₇et dixit faciamus et ipsi nobis nomen

et eamus pugnare adversum gentes quae in circuitu nostro sunt

₅₈et praecepit his qui erant in exercitu suo et abierunt Iamniam

₅₉et exivit Gorgias de civitate et viri eius

obviam illi in pugnam

₆₀et fugati sunt Iosepphus et Azarias usque in fines Iudae

et ceciderunt illa die de populo Israhel ad duo milia viri

et facta est fuga magna in populo

₆₁quia non audierunt Iudam et fratres eius

existimantes se fortiter facturos

₆₂ipsi autem non erant de semine virorum illorum

per quos salus facta est in Israhel

₆₃et viri Iuda magnificati sunt valde in conspectu omnis Israhel

et gentium omnium ubi audiebatur nomen eorum

₆₄et convenerunt ad eos fausta adclamantes

₆₅et exivit Iudas et fratres eius

et expugnabant filios Esau in terra quae ad austrum est

et percussit Chebron et filias eius

et muros eius et turres succendit in circuitu

₆₆et movit castra ut iret in terra alienigenarum

et perambulabat Samariam

₆₇in illa die ceciderunt sacerdotes in bello

dum vult fortiter facere

dum sine consilio exiit in proelium

₆₈et declinavit Iudas in Azotum in terra alienigenarum

et vidit aras eorum

et spolia deorum ipsorum succendit igni

et cepit spolia civitatum et regressus est in terram

Iuda