LIBER I MACCHABEORUM 4

₁et adsumpsit Gorgias quinque milia virorum et mille equites electos

et moverunt castra nocte

₂ut adplicarent ad castra Iudaeorum et percuterent eos subito

et filii qui erant ex arce erant illi duces

₃et audivit Iudas et surrexit ipse et potentes

percutere virtutem exercituum regis

quae erat in Ammaum

₄adhuc enim dispersus erat exercitus a castris

₅et venit Gorgias in castra Iudae noctu et neminem

invenit

et quaerebant eos in montibus

quoniam dixit fugiunt hii a nobis

₆et cum dies factus esset apparuit Iudas in campo

cum tribus milibus virorum tantum

quia tegumenta et gladios non habebant

₇et viderunt castra gentium valida

et loricatos et equitatus in circuitu eorum

et hii docti proelium

₈et ait Iudas viris qui secum erant

ne timueritis multitudinem eorum et impetum eorum ne formidetis

₉mementote qualiter salvi facti sunt patres nostri in mari Rubro

cum sequeretur eos Pharao cum exercitu

₁₀et nunc clamemus in caelum

et miserebitur nostri et testamenti patrum

nostrorum

et conteret exercitum istum ante faciem nostram hodie

₁₁et scient omnes gentes quia est qui redimat et liberet Israhel

₁₂et levaverunt alienigenae oculos suos

et viderunt eos venientes ex adverso

₁₃et exierunt de castris in proelium

et tuba cecinerunt hii qui fuerant cum Iuda

₁₄et congressi sunt et contritae sunt gentes et fugerunt in campum

₁₅novissimi autem ceciderunt gladio

et persecuti sunt eos usque Gesoron

et usque in campos Idumeae et Azoti et Iamniae

et ceciderunt ex illis ad tria milia virorum

₁₆et reversus est Iudas et exercitus eius sequens eum

₁₇et dixit ad populum

non concupiscatis spolia quia bellum contra nos est

₁₈et Gorgias et exercitus eius in monte prope nos

sed state contra inimicos nostros et expugnate eos

et post hoc sumetis spolia

₁₉et adhuc loquente Iuda haec apparuit pars quaedam

prospiciens de monte

₂₀et vidit quod in fugam conversi sunt

et succensa sunt castra

fumus enim qui videbatur declarabat quod factum est

₂₁quibus illi conspectis timuerunt valde

aspicientes simul et Iudam et exercitum in campo paratum ad proelium

₂₂et fugerunt omnes in campo alienigenarum

₂₃et Iudas reversus est ad spolia castrorum

et acceperunt aurum multum et argentum

et hyacinthum et purpuram marinam et opes magnas

₂₄et conversi hymnum canebant

et benedicebant in caelum

quoniam bonum est

quoniam in saeculum misericordia eius

₂₅et facta est salus magna in Israhel in illa die

₂₆quicumque autem alienigenarum evaserunt

venerunt et nuntiaverunt Lysiae universa quae acciderant

₂₇quibus auditis ille consternatus est animo deficiebat

quod non qualia voluit talia contigerunt in Israhel

et qualia mandavit rex

₂₈et sequenti anno

congregavit electorum virorum sexaginta milia

et equitum quinque milia

ut debellaret eos

₂₉et venerunt in Iudaeam et castra posuerunt in Bethoron

et occurrit illis Iudas cum decem milibus viris

₃₀et viderunt exercitum fortem et oravit et dixit

benedictus es salvator Israhel

qui contrivisti impetum potentis in manu servi tui David

et tradidisti castra alienigenarum in manus Ionathae

filii Saul et armigeri eius

₃₁conclude exercitum istum in manu populi tui Israhel

et confundantur in exercitu suo et equitibus

₃₂da illis formidinem et tabefac audaciam virtutis eorum

et commoveantur contritione sua

₃₃deice eos gladio diligentium te

et conlaudent te omnes qui noverunt nomen tuum in hymnis

₃₄et commiserunt

et ceciderunt de exercitu Lysiae quinque milia virorum

₃₅videns autem Lysias suorum fugam et Iudaeorum audaciam

et quod parati sunt aut vivere aut mori fortiter

abiit Antiochiam et elegit milites

ut multiplicatus rursus veniret in Iudaeam

₃₆dixit autem Iudas et fratres eius ecce contriti sunt inimici nostri

ascendamus nunc mundare sancta et renovare

₃₇et congregatus est omnis exercitus et ascenderunt in montem Sion

₃₈et viderunt sanctificationem desertam

et altare profanatum et portas exustas

et in atriis virgulta nata sicut in saltu vel montibus

et pastoforia diruta

₃₉sciderunt vestimenta sua et planxerunt planctu magno

et inposuerunt cinerem

₄₀et ceciderunt in faciem super terram

et exclamaverunt tubis signorum et clamaverunt in caelum

₄₁tunc ordinavit Iudas viros

ut pugnarent adversus eos qui erant in arce

donec emundarent sancta

₄₂et elegit sacerdotes sine macula voluntatem habentes in lege Dei

₄₃et mundaverunt sancta

et tulerunt lapides contaminationis in locum inmundum

₄₄et cogitavit de altare holocaustorum quod profanatum erat

quid de eo faceret

₄₅et incidit illi consilium bonum ut destrueret

illud

ne forte esset illis in obprobrium

quia contaminaverunt illud gentes

et demoliti sunt illud

₄₆et reposuerunt lapides in monte domus in loco apto

quoadusque veniret propheta et responderet de eis

₄₇et acceperunt lapides integros secundum legem

et aedificaverunt altare novum secundum illud quod fuit prius

₄₈et aedificaverunt sancta et quae intra domum intrinsecus

et aedem et atria sanctificaverunt

₄₉et fecerunt vasa sancta nova

et intulerunt candelabrum et altare incensorum et mensam in templum

₅₀et incensum posuerunt super altare

et accenderunt lucernas quae super candelabrum erant

et lucebant in templo

₅₁et posuerunt super mensam panes et adpenderunt vela

et consummaverunt omnia opera quae fecerunt

₅₂et ante matutinum surrexerunt

quinta et vicesima mensis noni hic mensis casleu

centesimi quadragesimi octavi anni

₅₃et obtulerunt sacrificium secundum legem

super altare holocaustorum novum quod fecerunt

₅₄secundum tempus et secundum diem

in qua contaminaverunt illud gentes

in ipsa renovatum est in canticis et citharis et cinyris et

cymbalis

₅₅et cecidit omnis populus et adoraverunt

et benedixerunt in caelum ei qui

prosperavit eis

₅₆et fecerunt dedicationem altaris diebus octo

et obtulerunt holocausta cum laetitia

et salutaria laudis

₅₇et ornaverunt faciem templi coronis aureis et scutulis

et dedicaverunt portas et pastoforia

et inposuerunt eis ianuas

₅₈et facta est laetitia in populo magna valde

et aversum est obprobrium gentium

₅₉et statuit Iudas et fratres eius et universa ecclesia Israhel

ut agatur dies dedicationis altaris in temporibus suis ab anno in annum per dies octo

a quinta et vicesima mensis casleu cum laetitia et gaudio

₆₀et aedificaverunt in tempore illo montem Sion

et per circuitum muros altos et turres firmas

nequando venirent gentes et conculcarent eam sicut antea fecerunt

₆₁et conlocavit illic exercitum ut servarent eam

et munivit eam ad custodiendam Bethsuram

ut haberet populus munitionem contra faciem Idumeae