LIBER I MACCHABEORUM 2

₁in illis diebus surrexit Matthathias filius Iohannis

filii Simeonis

sacerdos ex filiis Ioarim ab Hierusalem

et consedit in monte Modin

₂et habebat filios quinque

Iohannan qui cognominabatur Gaddis

₃et Simeon qui cognominabatur Thasi

₄et Iudas qui vocabatur Macchabeus

₅et Eleazarus qui cognominabatur Abaron

et Ionathas qui cognominabatur Apphus

₆hii viderunt mala quae fiebant in populo Iuda et in Hierusalem

₇et dixit Matthathias

vae mihi ut quid natus sum videre contritionem populi mei

et contritionem civitatis sanctae

et sedere illic cum datur in manibus inimicorum

₈sancta in manu extraneorum facta sunt

templum eius sicut homo ignobilis

₉vasa gloriae eius captiva abducta sunt

trucidati sunt iuvenes eius in plateis

et iuvenes eius ceciderunt gladio inimicorum

₁₀quae gens non hereditavit regnum eius et non obtinuit spolia eius

₁₁omnis conpositio eius ablata est

quae erat libera facta est ancilla

₁₂et ecce sancta nostra et pulchritudo nostra et claritas nostra desolata

est

et coinquinaverunt eam gentes

₁₃quo ergo nobis adhuc vivere

₁₄et scidit Matthathias et filii eius vestimenta sua

et operuerunt se ciliciis et planxerunt valde

₁₅et venerunt illuc qui missi erant a rege Antiocho

ut cogerent eos qui confugerant in civitate Modin

immolare et accendere et a lege Dei

discedere

₁₆et multi de populo Israhel consentientes accesserunt ad eos

sed Matthathias et filii eius constanter steterunt

₁₇et respondentes qui missi erant ab Antiocho dixerunt Matthathiae

princeps et clarissimus et magnus es in hac civitate

et ornatus filiis et fratribus

₁₈ergo accede prior et fac iussum regis sicut fecerunt omnes gentes

et viri Iuda et qui remanserunt in Hierusalem

et eris tu et filii tui inter amicos regis

et amplificatus argento et auro et muneribus multis

₁₉et respondit Matthathias et dixit magna voce

et si omnes gentes regi Antiocho oboediunt

ut discedat unusquisque a servitute patrum suorum

et consentiunt mandatis eius

₂₀ego et filii mei et fratres mei oboediemus legi patrum nostrorum

₂₁propitius sit nobis Deus

non est nobis utile relinquere legem et iustitias Dei

₂₂non audibimus verba regis

Antiochi

nec sacrificabimus transgredientes legis nostrae

mandata

ut eamus altera via

₂₃et ut cessavit loqui verba haec

accessit quidam Iudaeus in omnium oculis

sacrificare idolis super aram in civitate Modin secundum iussum regis

₂₄et vidit Matthathias et doluit et contremuerunt renes eius

et ascendit furor eius secundum

iudicium legis

et insiliens trucidavit eum super aram

₂₅sed et virum quem miserat rex Antiochus

qui cogebat immolari

occidit in ipso tempore et aram destruxit

₂₆et zelatus est legem sicut fecit Finees Zambri filio Salomi

₂₇et exclamavit Matthathias voce magna dicens

omnis qui zelum habet legis statuens testamentum exeat post me

₂₈et fugit ipse et filii eius in montes

et reliquerunt quaecumque habebant in civitate

₂₉tunc descenderunt multi quaerentes iudicium et iustitiam in desertum

₃₀ut sederent ibi

ipsi et filii eorum et mulieres eorum et pecora eorum

quoniam induraverunt super eos mala

₃₁et renuntiatum est viris regis

et exercitui qui erat in Hierusalem civitate David

quoniam discessissent viri quidam qui dissipaverunt mandatum regis

in loca occulta in deserto

et abissent post illos multi

₃₂et statim perrexerunt ad eos

et constituerunt adversus eos proelium in die sabbatorum

₃₃et dixerunt ad eos resistitis et nunc adhuc

exite et facite secundum verbum regis et vivetis

₃₄et dixerunt non exibimus

neque faciemus verbum regis ut polluamus diem sabbatorum

₃₅et concitaverunt adversus eos proelium

₃₆et non responderunt eis

nec oppilaverunt loca occulta

₃₇dicentes moriamur omnes in simplicitate nostra

et testes erunt super nos caelum et terra quod iniuste perditis nos

₃₈et intulerunt eis bellum sabbatis

et mortui sunt ipsi et uxores eorum

et filii eorum et pecora eorum usque ad mille animas hominum

₃₉et cognovit Matthathias et amici eius

et luctum habuerunt super eos valde

₄₀et dixit vir proximo suo

si omnes fecerimus sicut fratres nostri fecerunt

et non pugnaverimus adversus gentes

pro animabus nostris et iustificationibus nostris

citius disperdent nos a terra

₄₁et cogitaverunt in illa die dicentes

omnis homo quicumque venerit ad nos in bello die sabbatorum

pugnemus adversus eum et non moriemur omnes

sicut mortui sunt fratres nostri in occultis

₄₂tunc congregata est ad eos synagoga Asideorum fortis viribus ex Israhel

omnis voluntarius in lege

₄₃et omnes qui fugiebant a malis additi sunt ad eos

et facti sunt illis ad firmamentum

₄₄et collegerunt exercitum et percusserunt peccatores in ira sua

et viros iniquos in indignatione sua

et ceteri fugerunt ad nationes ut evaderent

₄₅et circuivit Matthathias et amici eius

et destruxerunt aras

₄₆et circumciderunt pueros incircumcisos

quotquot invenerunt in finibus Israhel in fortitudine

₄₇et persecuti sunt filios superbiae

et prosperatum est opus in manu eorum

₄₈et obtinuerunt legem de manibus gentium et de manibus regum

et non dederunt cornu peccatori

₄₉et adpropinquaverunt dies Matthathiae moriendi

et dixit filiis suis nunc confortata est superbia et castigatio

et tempus eversionis et ira indignationis

₅₀nunc ergo o filii aemulatores estote legis

et date animas vestras pro testamento patrum

₅₁et mementote operum patrum quae fecerunt in generationibus suis

et accipietis gloriam magnam et nomen aeternum

₅₂Abraham nonne in temptatione inventus est fidelis

et reputatum est ei ad iustitiam

₅₃Ioseph in tempore angustiae suae custodivit mandatum

et factus est dominus Aegypti

₅₄Finees pater noster zelando zelum Dei

accepit testamentum sacerdotii aeterni

₅₅Iesus dum implet verbum

factus est dux Israhel

₅₆Chaleb dum testificatur in ecclesia accepit hereditatem

₅₇David in sua misericordia consecutus est sedem regni in saecula

₅₈Helias dum zelat zelum legis receptus est in caelum

₅₉Ananias Azarias Misahel credentes liberati sunt de

flamma

₆₀Danihel in sua simplicitate liberatus est de ore leonum

₆₁et ita cogitate per generationem et generationem

quia omnes qui sperant in eum non infirmantur

₆₂et a verbis viri peccatoris non timueritis

quia gloria eius stercus et vermis est

₆₃hodie extollitur et cras non invenietur

quia conversus est in terram suam et cogitatio eius periet

₆₄vos ergo filii confortamini et viriliter agite in lege

quia in ipsa gloriosi eritis

₆₅et ecce Simeon frater vester scio quod vir consilii est

ipsum audite semper et ipse vobis erit pater

₆₆et Iudas Macchabeus fortis viribus a iuventute sua

sit vobis princeps militiae et ipse aget bellum populi

₆₇et vos adducetis ad vos omnes factores legis

et vindicate vindictam populi vestri

₆₈et retribuite retributionem gentibus

et intendite in praeceptum legis

₆₉et benedixit eos et adpositus est ad patres suos

₇₀et defunctus est centesimo et quadragesimo et sexto anno

et sepultus est a filiis suis in sepulchris patrum suorum in Modin

et planxerunt eum omnis Israhel planctu magno