LIBER I MACCHABEORUM 1

₁Et factum est postquam percussit Alexander Philippi Macedo

qui primus regnavit in Graecia

egressus de terra Cetthim Darium regem Persarum et Medorum

₂constituit proelia multa

et omnium obtinuit munitiones

et interfecit reges terrae

₃et pertransiit usque ad fines terrae

et accepit spolia multitudinis gentium

et siluit terra in conspectu eius

₄et congregavit virtutem exercituum fortem nimis

et exaltatum est et elevatum cor eius

₅et obtinuit regiones gentium et tyrannos

et facti sunt illi in tributum

₆et post haec decidit in lectum

et cognovit quia moritur

₇et vocavit pueros suos nobiles qui secum erant nutriti a iuventute

et divisit illis regnum suum cum adhuc viveret

₈et regnavit Alexander annis duodecim et mortuus est

₉et obtinuerunt pueri eius regnum unusquisque in loco suo

₁₀et inposuerunt sibi omnes diademata post mortem eius

et filii eorum post eos annis multis

et multiplicata sunt mala in terra

₁₁et exiit ex eis radix peccatrix Antiochus Inlustris

filius Antiochi regis qui fuerat Romae obses

et regnavit in anno centesimo tricesimo et septimo

regni Graecorum

₁₂in diebus illis exierunt ex Israhel filii iniqui

et suaserunt multis dicentes

eamus et disponamus testamentum cum gentibus

quae circa nos sunt

quia ex quo recessimus ab eis invenerunt nos multa mala

₁₃et bonus visus est sermo in oculis eorum

₁₄et destinaverunt aliqui de populo et abierunt ad regem

et dedit illis potestatem ut facerent iustitiam gentium

₁₅et aedificaverunt gymnasium in Hierosolymis

secundum leges nationum

₁₆et fecerunt sibi praeputia

et recesserunt a testamento sancto et iuncti sunt nationibus

et venundati sunt ut facerent malum

₁₇et paratum est regnum in conspectu Antiochi

et coepit regnare in terra Aegypti ut regnaret super duo regna

₁₈et intravit in Aegyptum in multitudine gravi

in curribus et elefantis et equitibus

et copiosa navium multitudine

₁₉et constituit bellum adversus Ptolomeum regem Aegypti

et veritus est Ptolomeus a facie eius et fugit

et ceciderunt vulnerati multi

₂₀et conprehendit civitates munitas in terra Aegypti

et accepit spolia terrae Aegypti

₂₁et convertit Antiochus postquam percussit Aegyptum

in centesimo et quadragesimo et tertio anno

et ascendit ad Israhel

₂₂et ascendit Hierosolymis in multitudine gravi

₂₃et intravit in sanctificationem cum superbia

et accepit altare aureum et candelabrum luminis et universa vasa eius

et mensam propositionis et libatoria

et fialas et mortariola aurea et velum et coronas

et ornamentum aureum quod in facie templi erat

et comminuit omnia

₂₄et accepit argentum et aurum et vasa concupiscibilia

et accepit thesauros occultos quos invenit

et sublatis omnibus abiit in terram suam

₂₅et fecit caedem hominum et locutus est superbia magna

₂₆et factus est planctus magnus in Israhel et in omni loco eorum

₂₇et ingemuerunt principes et seniores

virgines et iuvenes infirmati sunt

et speciositas mulierum inmutata est

₂₈omnis maritus sumpsit lamentum

quae sedebant in toro maritali lugebant

₂₉et commota est terra super habitantes in ea

et universa domus Iacob induit confusionem

₃₀et post duos annos dierum

misit rex principem tributorum in civitates Iuda

et venit Hierusalem cum turba magna

₃₁et locutus est ad eos verba pacifica in dolo et crediderunt ei

₃₂et inruit super civitatem repente et percussit eam plaga

et perdidit populum multum ex Israhel

₃₃et accepit spolia civitatis et succendit eam igni

et destruxit domos eius et muros eius in circuitu

₃₄et captivas duxerunt mulieres et natos et pecora possederunt

₃₅et aedificaverunt civitatem David muro magno et firmo et turribus firmis

et facta est illis in arcem

₃₆et posuerunt illic gentem peccatorum

viros iniquos et convaluerunt in ea

et posuerunt arma et escas et congregaverunt spolia Hierusalem

₃₇et reposuerunt illic et facti sunt in laqueum magnum

₃₈et factum est hoc ad insidias sanctificationi

et in diabolum malum in Israhel

₃₉et effuderunt sanguinem innocentem per circuitum sanctificationis

et contaminaverunt sanctificationem

₄₀et fugerunt habitatores Hierusalem propter eos

et facta est habitatio exterorum et facta est extera semini suo

et nati eius reliquerunt eam

₄₁sanctificatio eius desolata est sicut solitudo

dies festi eius conversi sunt in luctum

sabbata eius in obprobrium honores eius in nihilum

₄₂secundum gloriam eius multiplicata est ignominia eius

et sublimitas eius conversa est in luctum

₄₃et scripsit rex Antiochus omni regno suo ut esset omnis populus unus

et reliquerunt unusquisque legem suam

₄₄et consenserunt omnes gentes secundum verbum regis Antiochi

₄₅et multi ex Israhel consenserunt ei

et sacrificaverunt idolis et coinquinaverunt sabbatum

₄₆et misit rex Antiochus libros per manus nuntiorum in

Hierusalem

et in omnes civitates Iudae

ut sequerentur legem gentium terrae

₄₇et prohiberent holocausta et sacrificia et placationes fieri in templo

Dei

₄₈et prohiberent celebrari sabbatum et dies sollemnes

₄₉et coinquinari sancta et sanctum populum Israhel

₅₀et iussit aedificari aras et templa et idola

et immolari carnes suillas et pecora communia

₅₁et relinquere filios suos incircumcisos

et coinquinari animas eorum in omnibus inmundis et abominationibus

ita ut obliviscerentur legem et inmutarent omnes iustificationes Dei

₅₂et quicumque non fecisset secundum verbum regis

Antiochi moreretur

₅₃secundum omnia verba haec scripsit omni regno suo

et praeposuit principes populo qui haec fieri cogerent

₅₄et iusserunt civitatibus Iudae sacrificare

₅₅et congregati sunt multi de populo

ad eos qui dereliquerant legem Domini

et fecerunt mala super terram

₅₆et effugaverunt populum Israhel

in abditis et in absconditis fugitivorum locis

₅₇die quintadecima mensis casleu

quinto et quadragesimo anno aedificavit rex

Antiochus

abominandum idolum desolationis super altare Dei

et per universas civitates Iudae in circuitu

aedificaverunt aras

₅₈et ante ianuas domorum et in plateis incendebant tura et sacrificabant

₅₉et libros legis Dei conbuserunt igni scindentes eos

₆₀et apud quemcumque inveniebantur libri testamenti Domini

et quicumque observabant legem Domini

secundum edictum regis trucidabant eum

₆₁in virtute sua faciebant haec populo Israhel

qui inveniebantur in omni mense in

civitatibus

₆₂et quinta et vicesima die mensis

sacrificabant super aram quae erat contra altare

₆₃et mulieres quae circumcidebant filios suos trucidabantur

secundum iussum regis Antiochi

₆₄et suspendebant pueros a cervicibus per universas domos eorum

et eos qui circumciderunt eos trucidabant

₆₅et multi de populo Israhel definierunt apud se

ut non manducarent inmunda

et elegerunt magis mori quam cibis coinquinari inmundis

₆₆et noluerunt infringere legem Dei sanctam et trucidati sunt

₆₇et facta est ira magna super populum valde