VERBA DIERUM I 29

₁locutusque est David rex ad omnem ecclesiam

Salomonem filium meum unum elegit Deus

adhuc puerum et tenellum

opus autem grande est

neque enim homini praeparatur habitatio sed Deo

₂ego autem totis viribus meis

praeparavi inpensas domus Dei mei

aurum ad vasa aurea et argentum in argentea aes in aenea

ferrum in ferrea lignum ad lignea

lapides onychinos et quasi stibinos et diversorum colorum

omnem pretiosum lapidem et marmor parium abundantissime

₃et super haec quae obtuli in domum Dei mei

de peculio meo aurum et argentum do in templum Dei mei

exceptis his quae paravi in aedem

sanctam

₄tria milia talenta auri de auro Ophir

et septem milia talentorum argenti probatissimi

ad deaurandos parietes templi

₅ut ubicumque opus est aurum de auro

et ubicumque opus est argentum

argenti opera fiant per manus artificum

et si quis sponte offert impleat manum suam hodie

et offerat quod voluerit Domino

₆polliciti sunt itaque principes familiarum et proceres tribuum Israhel

tribuni quoque et centuriones et principes possessionum regis

₇dederuntque in opera domus Dei

auri talenta quinque milia et solidos decem milia

argenti talenta decem milia et aeris talenta decem et octo milia

ferri quoque centum milia talentorum

₈et apud quemcumque inventi sunt lapides

dederunt in thesaurum domus Domini

per manum Ieihel Gersonitis

₉laetatusque est populus cum vota sponte promitterent

quia corde toto offerebant ea Domino

sed et David rex laetatus est gaudio magno

₁₀et benedixit Domino coram universa multitudine et ait

benedictus es Domine Deus Israhel patris nostri

ab aeterno in aeternum

₁₁tua est Domine magnificentia et potentia et gloria atque victoria

et tibi laus

cuncta enim quae in caelo sunt et in terra tua sunt

tuum Domine regnum et tu es super omnes principes

₁₂tuae divitiae et tua est gloria tu dominaris omnium

in manu tua virtus et potentia

in manu tua magnitudo et imperium omnium

₁₃nunc igitur Deus noster confitemur tibi

et laudamus nomen tuum inclitum

₁₄quis ego et quis populus meus

ut possimus haec tibi universa promittere

tua sunt omnia

et quae de manu tua accepimus dedimus tibi

₁₅peregrini enim sumus coram te

et advenae sicut omnes patres nostri

dies nostri quasi umbra super terram et nulla est mora

₁₆Domine Deus noster omnis haec copia quam paravimus

ut aedificaretur domus nomini sancto tuo

de manu tua est et tua sunt omnia

₁₇scio Deus meus quod probes corda et simplicitatem diligas

unde et ego in simplicitate cordis mei laetus obtuli universa

haec

et populum tuum qui hic reppertus est

vidi cum ingenti gaudio tibi offerre donaria

₁₈Domine Deus Abraham et Isaac et Israhel patrum nostrorum

custodi in aeternum hanc voluntatem cordis eorum

et semper in venerationem tui mens ista permaneat

₁₉Salomoni quoque filio meo da cor perfectum

ut custodiat mandata tua testimonia tua

caerimonias tuas

et faciat universa et aedificet aedem cuius inpensas paravi

₂₀praecepit autem David universae ecclesiae

benedicite Domino Deo nostro

et benedixit omnis ecclesia Domino Deo patrum suorum

et inclinaverunt se et adoraverunt Deum et deinde regem

₂₁immolaveruntque victimas Domino

et obtulerunt holocausta die sequenti

tauros mille arietes mille agnos mille

cum libaminibus suis et universo ritu

abundantissime in omnem Israhel

₂₂et comederunt et biberunt coram Domino

in die illo cum grandi laetitia

et unxerunt secundo Salomonem filium David

unxerunt autem Domino in principem

et Sadoc in pontificem

₂₃seditque Salomon super solium Domini in regem

pro David patre suo

et cunctis placuit et paruit illi omnis Israhel

₂₄sed et universi principes et potentes

et cuncti filii regis David dederunt manum

et subiecti fuerunt Salomoni regi

₂₅magnificavit ergo Dominus Salomonem super omnem Israhel

et dedit illi gloriam regni qualem nullus habuit ante eum rex Israhel

₂₆igitur David filius Isai regnavit super universum Israhel

₂₇et dies quibus regnavit super Israhel fuerunt quadraginta anni

in Hebron regnavit septem annis

et in Hierusalem triginta tribus

₂₈et mortuus est in senectute bona plenus dierum et divitiis et gloria

regnavitque Salomon filius eius pro eo

₂₉gesta autem David regis priora et novissima

scripta sunt in libro Samuhel videntis

et in libro Nathan prophetae atque in volumine Gad videntis

₃₀universique regni eius et fortitudinis

et temporum quae transierunt sub eo

sive in Israhel sive in cunctis regnis terrarum