VERBA DIERUM I 27

₁filii autem Israhel secundum numerum suum principes familiarum

tribuni et centuriones et praefecti

qui ministrabant regi iuxta turmas suas

ingredientes et egredientes per singulos menses in anno

viginti quattuor milibus singuli praeerant

₂primae turmae in primo mense Isboam praeerat filius Zabdihel

et sub eo viginti quattuor milia

₃de filiis Phares princeps cunctorum principum in exercitu

mense primo

₄secundi mensis habebat turmam Dudi Ahohites

et post se alterum nomine Macelloth

qui regebat partem exercitus viginti quattuor milium

₅dux quoque turmae tertiae in mense tertio

erat Banaias filius Ioiadae sacerdos

et in divisione sua viginti quattuor milia

₆ipse est Banaias fortissimus inter triginta et super triginta

praeerat autem turmae ipsius Amizabad filius eius

₇quartus mense quarto Asahel frater Ioab

et Zabadias filius eius post eum

et in turma eius viginti quattuor milia

₈quintus mense quinto princeps Samaoth Iezarites

et in turma eius viginti quattuor milia

₉sextus mense sexto Hira filius Acces Thecuites

et in turma eius viginti quattuor milia

₁₀septimus mense septimo Helles Phallonites de filiis Ephraim

et in turma eius viginti quattuor milia

₁₁octavus mense octavo Sobochai Asothites de stirpe Zarai

et in turma eius viginti quattuor milia

₁₂nonus mense nono Abiezer Anathothites de filiis Iemini

et in turma eius viginti quattuor milia

₁₃decimus mense decimo Marai et ipse Netophathites de stirpe Zarai

et in turma eius viginti quattuor milia

₁₄undecimus mense undecimo Banaias Pharathonites de filiis Ephraim

et in turma eius viginti quattuor milia

₁₅duodecimus mense duodecimo Holdai Netophathites de stirpe Gothonihel

et in turma eius viginti quattuor milia

₁₆porro tribubus praeerant Israhel

Rubenitis dux Eliezer filius Zechri

Symeonitis dux Saphatias filius Macha

₁₇Levitis Asabias filius Camuhel

Aaronitis Sadoc

₁₈Iuda Heliu frater David

Isachar Amri filius Michahel

₁₉Zabulonitis Iesmaias filius Abdiae

Nepthalitibus Ierimoth filius Ozihel

₂₀filiis Ephraim Osee filius Ozaziu

dimidio tribus Manasse Iohel filius

Phadiae

₂₁et dimidio tribus Manasse in Galaad

Iaddo filius Zacchariae

Beniamin autem Iasihel filius Abner

₂₂Dan vero Ezrihel filius Hieroam

hii principes filiorum Israhel

₂₃noluit autem David numerare eos a viginti annis inferius

quia dixerat Dominus ut multiplicaret Israhel quasi stellas

caeli

₂₄Ioab filius Sarviae coeperat numerare nec conplevit

quia super hoc ira inruerat in Israhel

et idcirco numerus eorum qui fuerant recensiti

non est relatus in fastos regis David

₂₅super thesauros autem regis fuit Azmoth filius Adihel

his autem thesauris qui erant in urbibus et in vicis et in turribus

praesidebat Ionathan filius Oziae

₂₆operi autem rustico et agricolis qui exercebant terram

praeerat Ezri filius Chelub

₂₇vinearumque cultoribus Semeias Ramathites

cellis autem vinariis Zabdias Aphonites

₂₈nam super oliveta et ficeta quae erant in campestribus Balanan Gaderites

super apothecas autem olei Ioas

₂₉porro armentis quae pascebantur in Sarona

praepositus fuit Setrai Saronites

et super boves in vallibus Saphat filius Adli

₃₀super camelos vero Ubil Ismahelites

et super asinos Iadias Meronathites

₃₁super oves quoque Iaziz Agarenus

omnes hii principes substantiae regis David

₃₂Ionathan autem patruus David consiliarius vir prudens et litteratus

ipse et Iaihel filius Achamoni erant cum filiis

regis

₃₃Ahitophel etiam consiliarius regis et Husi Arachites amicus regis

₃₄post Ahitophel fuit Ioiada filius Banaiae et Abiathar

princeps autem exercitus regis erat Ioab