VERBA DIERUM I 22

₁dixitque David haec est domus Dei

et hoc altare in holocaustum Israhel

₂et praecepit ut congregarentur omnes proselyti de terra Israhel

et constituit ex eis latomos ad caedendos

lapides et poliendos

ut aedificaretur domus Dei

₃ferrum quoque plurimum ad clavos ianuarum

et ad commissuras atque iuncturas praeparavit David

et aeris pondus innumerabile

₄ligna quoque cedrina non poterant aestimari

quae Sidonii et Tyrii deportaverant ad David

₅et dixit David

Salomon filius meus puer parvulus est et delicatus

domus autem quam aedificari volo Domino talis esse debet

ut in cunctis regionibus nominetur

praeparabo ergo ei necessaria

et ob hanc causam ante mortem suam omnes paravit inpensas

₆vocavitque Salomonem filium suum

et praecepit ei ut aedificaret domum Domino Deo Israhel

₇dixitque David ad Salomonem fili mi voluntatis meae fuit

ut aedificarem domum nomini Domini Dei mei

₈sed factus est ad me sermo Domini dicens

multum sanguinem effudisti et plurima bella bellasti

non poteris aedificare domum nomini meo

tanto effuso sanguine coram me

₉filius qui nascetur tibi et erit vir

quietissimus

faciam enim eum requiescere ab omnibus inimicis suis per circuitum

et ob hanc causam pacificus vocabitur

et pacem et otium dabo in Israhel cunctis diebus eius

₁₀ipse aedificabit domum nomini meo

et ipse erit mihi in filium et ego ero ei in patrem

firmaboque solium regni eius super Israhel in aeternum

₁₁nunc ergo fili mi sit Dominus tecum et prosperare

et aedifica domum Domino Deo tuo sicut locutus est de te

₁₂det quoque tibi Dominus prudentiam et sensum

ut regere possis Israhel et custodire legem Domini Dei tui

₁₃tunc enim proficere poteris si custodieris mandata et iudicia

quae praecepit Dominus Mosi ut doceret Israhel

confortare viriliter age ne timeas neque paveas

₁₄ecce ego in paupertatula mea

praeparavi inpensas domus Domini

auri talenta centum milia et argenti mille milia talentorum

aeris vero et ferri non est pondus

vincitur enim numerus magnitudine

ligna et lapides praeparavi ad universa inpendia

₁₅habes quoque plurimos artifices latomos et cementarios

artificesque lignorum et omnium artium

ad faciendum opus prudentissimos

₁₆in auro et argento aere et ferro cuius non est

numerus

surge igitur et fac et erit Dominus tecum

₁₇praecepit quoque David cunctis principibus Israhel

ut adiuvarent Salomonem filium suum

₁₈cernitis inquiens quod Dominus Deus vester vobiscum sit

et dederit vobis requiem per circuitum

et tradiderit omnes inimicos in manu vestra

et subiecta sit terra coram Domino et coram populo eius

₁₉praebete igitur corda vestra et animas vestras

ut quaeratis Dominum Deum vestrum

et consurgite et aedificate sanctuarium Domino Deo

ut introducatur arca foederis Domini et vasa Domino consecrata

in domum quae aedificatur nomini Domini