VERBA DIERUM I 23

₁igitur David senex et plenus dierum

regem constituit Salomonem filium suum super Israhel

₂et congregavit omnes principes Israhel et sacerdotes atque Levitas

₃numeratique sunt Levitae a triginta annis et supra

et inventa sunt triginta octo milia virorum

₄ex his electi sunt et distributi in ministerium domus Domini

viginti quattuor milia

praepositorum autem et iudicum sex milia

₅porro quattuor milia ianitores

et totidem psaltae canentes Domino in

organis

quae fecerat ad canendum

₆et distribuit eos David per vices filiorum Levi

Gersom videlicet et Caath et Merari

₇Gersom Leedan et Semei

₈filii Leedan princeps Ieihel et Zetham et Iohel tres

₉filii Semei Salomith et Ozihel et Aran tres

isti principes familiarum Leedan

₁₀porro filii Semei Ieeth et Ziza et Iaus

et Baria

isti filii Semei quattuor

₁₁erat autem Ieeth prior Ziza secundus

porro Iaus et Baria non habuerunt plurimos filios

et idcirco in una familia unaque domo conputati sunt

₁₂filii Caath Amram et Isaar Hebron et Ozihel quattuor

₁₃filii Amram Aaron et Moses

separatusque est Aaron ut ministraret in sancto sanctorum

ipse et filii eius in sempiternum

et adoleret incensum Domino secundum ritum suum

ac benediceret nomini eius in perpetuum

₁₄Mosi quoque hominis Dei filii adnumerati sunt in tribu Levi

₁₅filii Mosi Gersom et Eliezer

₁₆filii Gersom Subuhel primus

₁₇fuerunt autem filii Eliezer Roobia primus

et non erant Eliezer filii alii

porro filii Roobia multiplicati sunt nimis

₁₈filii Isaar Salumith primus

₁₉filii Hebron Ieriau primus Amarias secundus

Iazihel tertius Iecmaam quartus

₂₀filii Ozihel Micha primus Iesia secundus

₂₁filii Merari Mooli et Musi

filii Mooli Eleazar et Cis

₂₂mortuus est autem Eleazar et non habuit filios sed filias

acceperuntque eas filii Cis fratres earum

₂₃filii Musi Mooli et Eder et Ierimuth tres

₂₄hii filii Levi in cognationibus et familiis suis

principes per vices et numerum capitum singulorum

qui faciebant opera ministerii domus Domini a viginti annis et supra

₂₅dixit enim David

requiem dedit Dominus Deus Israhel populo suo

et habitationem Hierusalem usque in aeternum

₂₆nec erit officii Levitarum

ut ultra portent tabernaculum et omnia vasa eius ad ministrandum

₂₇iuxta praecepta quoque David novissima

supputabitur numerus filiorum Levi a viginti annis et supra

₂₈et erunt sub manu filiorum Aaron in cultum domus Domini

in vestibulis et in exedris et in loco purificationis et in sanctuario

et in universis operibus ministerii templi Domini

₂₉sacerdotes autem super panes propositionis

et ad similae sacrificium

et ad lagana et azyma et sartaginem

et ad ferventem similam

et super omne pondus atque mensuram

₃₀Levitae vero ut stent mane ad confitendum et canendum Domino

similiterque ad vesperam

₃₁tam in oblatione holocaustorum Domini

quam in sabbatis et kalendis et sollemnitatibus reliquis

iuxta numerum et caerimonias uniuscuiusque rei

iugiter coram Domino

₃₂et custodiant observationes tabernaculi foederis et ritum sanctuarii

et observationem filiorum Aaron fratrum suorum

ut ministrent in domo Domini