VERBA DIERUM I 11

₁congregatus est igitur omnis Israhel ad David in Hebron dicens

os tuum sumus et caro tua

₂heri quoque et nudius tertius cum adhuc regnaret Saul

tu eras qui educebas et introducebas Israhel

tibi enim dixit Dominus Deus tuus

tu pasces populum meum Israhel

et tu eris princeps super eum

₃venerunt ergo omnes maiores natu Israhel ad regem in Hebron

et iniit David cum eis foedus coram Domino

unxeruntque eum regem super Israhel

iuxta sermonem Domini quem locutus est in manu Samuhel

₄abiit quoque David et omnis Israhel in Hierusalem haec est Iebus

ubi erant Iebusei habitatores terrae

₅dixeruntque qui habitabant in Iebus ad David non ingredieris huc

porro David cepit arcem Sion quae est civitas David

₆dixitque

omnis qui percusserit Iebuseum in primis erit princeps et dux

ascendit igitur primus Ioab filius Sarviae et factus est princeps

₇habitavit autem David in arce et idcirco appellata est civitas David

₈aedificavitque urbem in circuitu a Mello usque ad gyrum

Ioab autem reliqua urbis extruxit

₉proficiebatque David vadens et crescens

et Dominus exercituum erat cum eo

₁₀hii principes virorum fortium David

qui adiuverunt eum ut rex fieret super omnem Israhel

iuxta verbum Domini quod locutus est ad Israhel

₁₁et iste numerus robustorum David

Iesbaam filius Achamoni princeps inter triginta

iste levavit hastam suam super trecentos vulneratos una vice

₁₂et post eum Eleazar filius patrui eius Ahoites

qui erat inter tres potentes

₁₃iste fuit cum David in Aphesdommim

quando Philisthim congregati sunt ad locum illum in proelium

et erat ager regionis illius plenus hordeo

fugeratque populus a facie Philisthinorum

₁₄hic stetit in medio agri et defendit eum

cumque percussisset Philistheos

dedit Dominus salutem magnam populo suo

₁₅descenderunt autem tres de triginta principibus

ad petram in qua erat David ad speluncam Odollam

quando Philisthim fuerant castrametati in valle

Raphaim

₁₆porro David erat in praesidio et statio Philisthinorum in Bethleem

₁₇desideravit igitur David et dixit

o si quis daret mihi aquam de cisterna Bethleem quae est

in porta

₁₈tres ergo isti per media castra Philisthinorum perrexerunt

et hauserunt aquam de cisterna Bethleem quae erat in porta

et adtulerunt ad David ut biberet

qui noluit sed magis libavit illam Domino

₁₉dicens

absit ut in conspectu Dei mei hoc faciam

et sanguinem virorum istorum bibam

quia in periculo animarum suarum adtulerunt mihi aquam

et ob hanc causam noluit bibere

haec fecerunt tres robustissimi

₂₀Abisai quoque frater Ioab ipse erat princeps trium

et ipse levavit hastam suam contra trecentos vulneratos

et ipse erat inter tres nominatissimus

₂₁inter tres secundos inclitus et princeps

eorum

verumtamen usque ad tres primos non pervenerat

₂₂Banaia filius Ioiadae viri robustissimi

qui multa opera perpetrarat de Capsehel

ipse percussit duos Arihel Moab

et ipse descendit et interfecit leonem in media cisterna tempore nivis

₂₃et ipse percussit virum aegyptium

cuius statura erat quinque cubitorum

et habebat lanceam ut liciatorium texentium

descendit ergo ad eum cum virga

et rapuit hastam quam tenebat manu et interfecit eum hasta sua

₂₄haec fecit Banaia filius Ioiada

qui erat inter tres robustos nominatissimus

₂₅inter triginta primus

verumtamen ad tres usque non pervenerat

posuit autem eum David ad auriculam suam

₂₆porro fortissimi in exercitu

Asahel frater Ioab

et Eleanan filius patrui eius de Bethleem

₂₇Semmoth Arorites Helles Phallonites

₂₈Iras filius Acces Thecuites Abiezer Anathothites

₂₉Sobbochai Asothites Ilai Ahoites

₃₀Marai Netophathites Heled filius Baana Netophathites

₃₁Ethai filius Ribai de Gabaath filiorum Beniamin

Banaia Pharathonites

₃₂Uri de torrente Gaas

Abial Arabathites Azmoth Bauramites Eliaba Salabonites

₃₃filii Asom Gezonites Ionathan filius Sega Ararites

₃₄Ahiam filius Sachar Ararites

₃₅Eliphal filius Ur

₃₆Apher Mechurathites Ahia Phellonites

₃₇Asrai Carmelites Noorai filius Azbi

₃₈Iohel frater Nathan Mabar filius Agarai

₃₉Sellec Ammonites

Noorai Berothites armiger Ioab filii Sarviae

₄₀Iras Iethreus Gareb Iethreus

₄₁Urias Ettheus Zabad filius Ooli

₄₂Adina filius Seza Rubenites princeps Rubenitarum

et cum eo triginta

₄₃Hanan filius Maacha et Iosaphat Mathanites

₄₄Ozias Astharothites Semma et Iaihel filii Hotam Aroerites

₄₅Iedihel filius Samri et Ioha frater eius Thosaites

₄₆Elihel Maumites et Ieribai et Iosaia filii Elnaem

et Iethma Moabites Elihel et Obed et Iasihel de Masobia