VERBA DIERUM I 12

₁hii quoque venerunt ad David in Siceleg

cum adhuc fugeret Saul filium Cis

qui erant fortissimi et egregii pugnatores

₂tendentes arcum

et utraque manu fundis saxa iacientes et dirigentes sagittas

de fratribus Saul ex Beniamin

₃princeps Ahiezer et Ioas filii Sammaa Gabathites

et Iazihel et Phallet filii Azmoth et Baracha et Ieu Anathothites

₄Samaias quoque Gabaonites

fortissimus inter triginta et super triginta

Hieremias et Iezihel et Iohanan et Iezbad Gaderothites

₅Eluzai et Ierimuth et Baalia et Samaria

et Saphatia Aruphites

₆Helcana et Iesia et Azrahel et Ioezer et Iesbaam de Careim

₇Ioeela quoque et Zabadia filii Ieroam de Gedor

₈sed et de Gaddi transfugerunt ad David cum lateret in deserto

viri robustissimi et pugnatores optimi tenentes clypeum et hastam

facies eorum quasi facies leonis

et veloces quasi capreae in montibus

₉Ezer princeps Obdias secundus

Eliab tertius

₁₀Masmana quartus

Hieremias quintus

₁₁Hetthi sextus

Helihel septimus

₁₂Iohanan octavus

Helzebad nonus

₁₃Hieremias decimus

Bachannai undecimus

₁₄hii de filiis Gad principes exercitus

novissimus centum militibus praeerat et maximus mille

₁₅isti sunt qui transierunt Iordanem mense primo

quando inundare consuevit super ripas suas

et omnes fugaverunt qui morabantur in vallibus

ad orientalem plagam et occidentalem

₁₆venerunt autem et de Beniamin et de Iuda

ad praesidium in quo morabatur David

₁₇egressusque est David obviam eis et ait

si pacifice venistis ad me ut auxiliemini mihi

cor meum iungatur vobis

si autem insidiamini mihi pro adversariis meis

cum ego iniquitatem in manibus non habeam

videat Deus patrum nostrorum et iudicet

₁₈spiritus vero induit Amessai principem inter triginta et

ait

tui sumus o David et tecum fili Isai pax

pax tibi et pax adiutoribus tuis te enim adiuvat Deus tuus

suscepit ergo eos David et constituit principes turmae

₁₉porro de Manasse transfugerunt ad David

quando veniebat cum Philisthim adversum Saul ut pugnaret

et non dimicavit cum eis

quia inito consilio remiserunt eum principes Philisthinorum dicentes

periculo capitis nostri revertetur ad dominum suum Saul

₂₀quando igitur reversus est in Siceleg

transfugerunt ad eum de Manasse

Ednas et Iozabad et Iedihel

et Michahel et Iozabad et Heliu et

Salathi

principes milium in Manasse

₂₁hii praebuerunt auxilium David adversum latrunculos

omnes enim erant viri fortissimi

et facti sunt principes in exercitu

₂₂sed et per singulos dies veniebant ad David ad auxiliandum ei

usque dum fieret grandis numerus quasi exercitus Dei

₂₃iste quoque est numerus principum exercitus

qui venerunt ad David cum esset in Hebron

ut transferrent regnum Saul ad eum iuxta verbum Domini

₂₄filii Iuda portantes clypeum et hastam

sex milia octingenti expediti ad proelium

₂₅de filiis Symeon virorum fortissimorum ad pugnandum

septem milia centum

₂₆de filiis Levi quattuor milia sescenti

₂₇Ioiada quoque princeps de stirpe Aaron

et cum eo tria milia septingenti

₂₈Sadoc etiam puer egregiae indolis

et domus patris eius principes viginti duo

₂₉de filiis autem Beniamin fratribus Saul tria milia

magna enim pars eorum adhuc sequebatur domum Saul

₃₀porro de filiis Ephraim viginti milia octingenti

fortissimi robore viri nominati in cognationibus suis

₃₁et ex dimidia parte tribus Manasse decem et octo milia

singuli per nomina sua

venerunt ut constituerent regem David

₃₂de filiis quoque Isachar viri eruditi

qui norant singula tempora

ad praecipiendum quid facere deberet Israhel principes ducenti

omnis autem reliqua tribus eorum consilium sequebatur

₃₃porro de Zabulon qui egrediebantur ad proelium

et stabant in acie instructi armis bellicis quinquaginta milia

venerunt in auxilium non in corde duplici

₃₄et de Nepthali principes mille

et cum eis instructa clypeo et hasta

triginta septem milia

₃₅de Dan etiam praeparata ad proelium

viginti octo milia sescentorum

₃₆et de Aser egredientes ad pugnam et in acie provocantes

quadraginta milia

₃₇trans Iordanem autem

de filiis Ruben et Gad et dimidia parte tribus Manasse

instructa armis bellicis centum viginti milia

₃₈omnes isti viri bellatores et expediti ad

pugnandum

corde perfecto venerunt in Hebron

ut constituerent regem David super universum Israhel

sed et omnes reliqui ex Israhel uno corde erant ut rex fieret David

₃₉fueruntque ibi apud David tribus diebus comedentes et bibentes

praeparaverunt enim eis fratres sui

₄₀sed et qui iuxta eos erant

usque ad Isachar et Zabulon et Nepthalim

adferebant panes in asinis et camelis et mulis et bubus ad vescendum

farinam palatas uvam passam vinum oleum

boves arietes ad omnem copiam

gaudium quippe erat in Israhel