PSALMI IUXTA LXX 95

Cantate Domino canticum novum cantate Domino omnis terra

₂cantate Domino benedicite nomini eius

adnuntiate diem de die salutare eius

₃adnuntiate inter gentes gloriam eius

in omnibus populis mirabilia eius

₄quoniam magnus Dominus et laudabilis valde

terribilis est super omnes deos

₅quoniam omnes dii gentium daemonia

at vero Dominus caelos fecit

₆confessio et pulchritudo in conspectu eius

sanctimonia et magnificentia in sanctificatione eius

₇adferte Domino patriae gentium

adferte Domino gloriam et honorem

₈adferte Domino gloriam nomini eius

tollite hostias et introite in atria eius

₉adorate Dominum in atrio sancto eius

commoveatur a facie eius universa terra

₁₀dicite in gentibus quia Dominus regnavit

etenim correxit orbem qui non movebitur

iudicabit populos in aequitate

₁₁laetentur caeli et exultet terra commoveatur mare et plenitudo eius

₁₂gaudebunt campi et omnia quae in eis sunt

tunc exultabunt omnia ligna silvarum

₁₃a facie Domini quia venit quoniam venit iudicare terram

iudicabit orbem terrae in aequitate et populos in veritate sua