PSALMI IUXTA LXX 94

Venite exultemus Domino iubilemus Deo salutari nostro

₂praeoccupemus faciem eius in confessione

et in psalmis iubilemus ei

₃quoniam Deus magnus Dominus et rex magnus super omnes deos

₄quia in manu eius fines terrae

et altitudines montium ipsius sunt

₅quoniam ipsius est mare et ipse fecit illud

et siccam manus eius formaverunt

₆venite adoremus et procidamus

et ploremus ante Dominum qui fecit nos

₇quia ipse est Deus noster

et nos populus pascuae eius et oves manus eius

₈hodie si vocem eius audieritis nolite obdurare corda vestra

₉sicut in inritatione secundum diem temptationis in deserto

ubi temptaverunt me patres vestri

probaverunt ※me: et viderunt opera mea

₁₀quadraginta annis offensus fui generationi illi

et dixi semper errant corde

₁₁et isti non cognoverunt vias meas

ut iuravi in ira mea si intrabunt in requiem meam