PSALMI IUXTA LXX 85

Inclina Domine aurem tuam ÷et: exaudi me

quoniam inops et pauper sum ego

₂custodi animam meam quoniam sanctus sum

salvum fac servum tuum Deus meus sperantem in te

₃miserere mei Domine quoniam ad te clamabo tota die

₄laetifica animam servi tui

quoniam ad te Domine animam meam levavi

₅quoniam tu Domine suavis et mitis

et multae misericordiae omnibus invocantibus te

₆auribus percipe Domine orationem meam

et intende voci orationis meae

₇in die tribulationis meae clamavi ad te

quia exaudisti me

₈non est similis tui in diis Domine

et non est secundum opera tua

₉omnes gentes quascumque fecisti venient

et adorabunt coram te Domine et glorificabunt nomen tuum

₁₀quoniam magnus es tu et faciens mirabilia

tu es Deus solus

₁₁deduc me Domine in via tua et ingrediar in veritate tua

laetetur cor meum ut timeat nomen tuum

₁₂confitebor tibi Domine Deus meus in toto corde meo

et glorificabo nomen tuum in aeternum

₁₃quia misericordia tua magna est super me

et eruisti animam meam ex inferno inferiori

₁₄Deus iniqui insurrexerunt super me

et synagoga potentium quaesierunt animam meam

et non proposuerunt te in conspectu suo

₁₅et tu Domine Deus miserator et misericors

patiens et multae misericordiae et verax

₁₆respice in me et miserere mei

da imperium tuum puero tuo et salvum fac filium ancillae tuae

₁₇fac mecum signum in bono

et videant qui oderunt me et confundantur

quoniam tu Domine adiuvasti me et consolatus es me