PSALMI IUXTA LXX 75

₂Notus in Iudaea Deus in Israhel magnum nomen eius

₃et factus est in pace locus eius et habitatio eius in Sion

₄ibi confregit potentias arcuum

scutum et gladium et bellum diapsalma

₅inluminas tu mirabiliter de montibus aeternis

₆turbati sunt omnes insipientes corde

dormierunt somnum suum et nihil invenerunt

omnes viri divitiarum manibus suis

₇ab increpatione tua Deus Iacob

dormitaverunt qui ascenderunt equos

₈tu terribilis es et quis resistet tibi ex tunc ira tua

₉de caelo auditum fecisti iudicium terra timuit et quievit

₁₀cum exsurgeret in iudicium Deus

ut salvos faceret omnes mansuetos terrae diapsalma

₁₁quoniam cogitatio hominis confitebitur tibi

et reliquiae cogitationis diem festum agent tibi

₁₂vovete et reddite Domino Deo vestro

omnes qui in circuitu eius adferent munera

terribili

₁₃et ei qui aufert spiritus principum

terribili apud reges terrae