PSALMI IUXTA LXX 61

₂Nonne Deo subiecta erit anima mea ab ipso enim salutare meum

₃nam et ipse Deus meus et salutaris meus

susceptor meus non movebor amplius

₄quousque inruitis in hominem

interficitis universi vos

tamquam parieti inclinato et maceriae depulsae

₅verumtamen pretium meum cogitaverunt repellere cucurri in siti

ore suo benedicebant et corde suo maledicebant diapsalma

₆verumtamen Deo subiecta esto anima mea

quoniam ab ipso patientia mea

₇quia ipse Deus meus et salvator meus

adiutor meus non emigrabo

₈in Deo salutare meum et gloria mea

Deus auxilii mei et spes mea in Deo est

₉sperate in eo omnis congregatio populi

effundite coram illo corda vestra

Deus adiutor noster in aeternum

₁₀verumtamen vani filii hominum

mendaces filii hominum in stateris

ut decipiant ipsi de vanitate in id ipsum

₁₁nolite sperare in iniquitate et rapinas nolite concupiscere

divitiae si affluant nolite cor adponere

₁₂semel locutus est Deus duo haec audivi

quia potestas Dei

₁₃et tibi Domine misericordia

quia tu reddes unicuique iuxta opera sua