PSALMI IUXTA LXX 62

₂Deus Deus meus ad te de luce vigilo

sitivit in te anima mea quam multipliciter tibi caro mea

₃in terra deserta et invia et inaquosa

sic in sancto apparui tibi

ut viderem virtutem tuam et gloriam tuam

₄quoniam melior est misericordia tua super vitas

labia mea laudabunt te

₅sic benedicam te in vita mea

in nomine tuo levabo manus meas

₆sicut adipe et pinguidine repleatur anima mea

et labia exultationis laudabit os meum

₇si memor fui tui super stratum meum

in matutinis meditabar in te

₈quia fuisti adiutor meus

et in velamento alarum tuarum exultabo

₉adhesit anima mea post te me suscepit dextera tua

₁₀ipsi vero in vanum quaesierunt animam meam

introibunt in inferiora terrae

₁₁tradentur in manus gladii partes vulpium erunt

₁₂rex vero laetabitur in Deo

laudabitur omnis qui iurat in eo

quia obstructum est os loquentium iniqua