PSALMI IUXTA LXX 41

₂Quemadmodum desiderat cervus ad fontes aquarum

ita desiderat anima mea ad te Deus

₃sitivit anima mea ad Deum ※fortem: vivum

quando veniam et parebo ante faciem Dei

₄fuerunt mihi lacrimae meae panis die ac nocte

dum dicitur mihi cotidie ubi est Deus tuus

₅haec recordatus sum et effudi in me animam meam

quoniam transibo in loco tabernaculi admirabilis

usque ad domum Dei

in voce exultationis et confessionis sonus epulantis

₆quare tristis es anima mea et quare conturbas me

spera in Deo quoniam confitebor illi

salutare vultus mei

₇Deus meus

ad me ipsum anima mea conturbata est

propterea memor ero tui

de terra Iordanis et Hermoniim a monte modico

₈abyssus ※ad: abyssum invocat

in voce cataractarum tuarum

omnia excelsa tua et fluctus tui super me transierunt

₉in die mandavit Dominus misericordiam suam

et nocte canticum eius

apud me oratio Deo vitae meae

₁₀dicam Deo susceptor meus es quare oblitus es mei

quare contristatus incedo dum adfligit me inimicus

₁₁dum confringuntur ossa mea

exprobraverunt mihi qui tribulant me

dum dicunt mihi per singulos dies ubi est Deus tuus

₁₂quare tristis es anima mea et quare conturbas me

spera in Deum quoniam ※adhuc: confitebor illi

salutare vultus mei ※et: Deus meus