PSALMI IUXTA LXX 146

Laudate Dominum quoniam bonum psalmus

Deo nostro sit iucunda ※decoraque: laudatio

₂aedificans Hierusalem Dominus

dispersiones Israhel congregabit

₃qui sanat contritos corde

et alligat contritiones illorum

₄qui numerat multitudinem stellarum

et omnibus eis nomina vocans

₅magnus Dominus noster et magna virtus eius

et sapientiae eius non est numerus

₆suscipiens mansuetos Dominus

humilians autem peccatores usque ad terram

₇praecinite Domino in confessione psallite Deo nostro in cithara

₈qui operit caelum nubibus et parat terrae pluviam

qui producit in montibus faenum

et herbam servituti hominum

₉et dat iumentis escam ipsorum

et pullis corvorum invocantibus eum

₁₀non in fortitudine equi voluntatem habebit

nec in tibiis viri beneplacitum erit ei

₁₁beneplacitum est Domino super timentes eum

et in eis qui sperant super misericordia eius