PSALMI IUXTA LXX 145

₂Lauda anima mea Dominum

laudabo Dominum in vita mea

psallam Deo meo quamdiu fuero

nolite confidere in principibus

₃in filiis hominum quibus non est salus

₄exibit spiritus eius et revertetur in terram suam

in illa die peribunt omnes cogitationes eorum

₅beatus cuius Deus Iacob adiutor eius

spes eius in Domino Deo ipsius

₆qui fecit caelum et terram mare et omnia quae in eis

₇qui custodit veritatem in saeculum

facit iudicium iniuriam patientibus

dat escam esurientibus

Dominus solvit conpeditos

₈Dominus inluminat caecos

Dominus erigit adlisos Dominus diligit iustos

₉Dominus custodit advenas pupillum et viduam suscipiet

et viam peccatorum disperdet

₁₀regnabit Dominus in saecula

Deus tuus Sion in generationem et generationem