PSALMI IUXTA LXX 137

Confitebor tibi Domine in toto corde meo

quoniam audisti verba oris mei

in conspectu angelorum psallam tibi

₂adorabo ad templum sanctum tuum et confitebor nomini tuo

super misericordia tua et veritate tua

quoniam magnificasti super omne nomen sanctum tuum

₃in quacumque die invocavero te exaudi me

multiplicabis me in anima mea virtute

₄confiteantur tibi Domine omnes reges terrae

quia audierunt omnia verba oris tui

₅et cantent in viis Domini quoniam magna gloria Domini

₆quoniam excelsus Dominus et humilia respicit

et alta a longe cognoscit

₇si ambulavero in medio tribulationis vivificabis me

super iram inimicorum meorum extendisti manum tuam

et salvum me fecit dextera tua

₈Dominus retribuet propter me

Domine misericordia tua in saeculum

opera manuum tuarum ne dispicias