PSALMI IUXTA LXX 105

Confitemini Domino quoniam bonus

quoniam in saeculum misericordia eius

₂quis loquetur potentias Domini auditas faciet omnes laudes eius

₃beati qui custodiunt iudicium et faciunt iustitiam in omni tempore

₄memento nostri Domine in beneplacito populi tui

visita nos in salutari tuo

₅ad videndum in bonitate electorum tuorum

ad laetandum in laetitia gentis tuae

et lauderis cum hereditate tua

₆peccavimus cum patribus nostris

iniuste egimus iniquitatem fecimus

₇patres nostri in Aegypto non intellexerunt mirabilia tua

non fuerunt memores multitudinis misericordiae tuae

et inritaverunt ascendentes in mare ※mare: Rubrum

₈et salvavit eos propter nomen suum

ut notam faceret potentiam suam

₉et increpuit mare Rubrum et exsiccatum est

et deduxit eos in abyssis sicut in deserto

₁₀et salvavit eos de manu odientium

et redemit eos de manu inimici

₁₁et operuit aqua tribulantes eos unus ex eis non remansit

₁₂et crediderunt in verbis eius

et laudaverunt laudem eius

₁₃cito fecerunt obliti sunt operum eius

non sustinuerunt consilium eius

₁₄et concupierunt concupiscentiam in deserto

et temptaverunt Deum in inaquoso

₁₅et dedit eis petitionem ipsorum

et misit saturitatem in anima eorum

₁₆et inritaverunt Mosen in castris Aaron sanctum Domini

₁₇aperta est terra et degluttivit Dathan

et operuit super congregationem Abiron

₁₈et exarsit ignis in synagoga eorum flamma conbusit peccatores

₁₉et fecerunt vitulum in Choreb et adoraverunt sculptile

₂₀et mutaverunt gloriam suam

in similitudine vituli comedentis faenum

₂₁obliti sunt Deum qui salvavit eos

qui fecit magnalia in Aegypto

₂₂mirabilia in terra Cham terribilia in mari Rubro

₂₃et dixit ut disperderet eos

si non Moses electus eius stetisset in confractione in conspectu eius

ut averteret iram eius ne disperderet eos

₂₄et pro nihilo habuerunt terram desiderabilem

non crediderunt verbo eius

₂₅et murmurabant in tabernaculis suis

non exaudierunt vocem Domini

₂₆et elevavit manum suam super eos ut prosterneret eos in deserto

₂₇et ut deiceret semen eorum in nationibus

et dispergeret eos in regionibus

₂₈et initiati sunt Beelphegor et comederunt sacrificia mortuorum

₂₉et inritaverunt eum in adinventionibus suis

et multiplicata est in eis ruina

₃₀et stetit Finees et placavit et cessavit quassatio

₃₁et reputatum est ei in iustitiam

in generatione et generationem usque in

sempiternum

₃₂et inritaverunt ad aquam Contradictionis

et vexatus est Moses propter eos

₃₃quia exacerbaverunt spiritum eius et distinxit in labiis suis

₃₄non disperdiderunt gentes quas dixit Dominus illis

₃₅et commixti sunt inter gentes et didicerunt opera eorum

₃₆et servierunt sculptilibus eorum et factum est illis in scandalum

₃₇et immolaverunt filios suos et filias suas daemoniis

₃₈et effuderunt sanguinem innocentem

sanguinem filiorum suorum et filiarum ※suarum:

quas sacrificaverunt sculptilibus Chanaan

et interfecta est terra in sanguinibus

₃₉et contaminata est in operibus eorum

et fornicati sunt in adinventionibus suis

₄₀et iratus est furore Dominus in populo suo

et abominatus est hereditatem suam

₄₁et tradidit eos in manus gentium

et dominati sunt eorum qui oderant eos

₄₂et tribulaverunt eos inimici eorum

et humiliati sunt sub manibus eorum

₄₃saepe liberavit eos

ipsi autem exacerbaverunt eum in consilio suo

et humiliati sunt in iniquitatibus suis

₄₄et vidit cum tribularentur et audiret orationem eorum

₄₅et memor fuit testamenti sui

et paenituit eum secundum multitudinem misericordiae suae

₄₆et dedit eos in misericordias

in conspectu omnium qui ceperant eos

₄₇salvos fac nos Domine Deus noster

et congrega nos de nationibus

ut confiteamur nomini tuo sancto

et gloriemur in laude tua

₄₈benedictus Dominus Deus Israhel a saeculo et usque in saeculum

et dicet omnis populus fiat fiat