PSALMI IUXTA LXX 104

Confitemini Domino et invocate nomen eius

adnuntiate inter gentes opera eius

₂cantate ei et psallite ei narrate omnia mirabilia eius

₃laudamini in nomine sancto eius

laetetur cor quaerentium Dominum

₄quaerite Dominum et confirmamini quaerite faciem eius semper

₅mementote mirabilium eius quae fecit

prodigia eius et iudicia oris eius

₆semen Abraham servi eius filii Iacob electi eius

₇ipse Dominus Deus noster in universa terra iudicia eius

₈memor fuit in saeculum testamenti sui

verbi quod mandavit in mille generationes

₉quod disposuit ad Abraham

et iuramenti sui ad Isaac

₁₀et statuit illud Iacob in praeceptum

et Israhel in testamentum aeternum

₁₁dicens tibi dabo terram Chanaan funiculum hereditatis vestrae

₁₂cum essent numero breves

paucissimos et incolas eius

₁₃et pertransierunt de gente in gentem

et de regno ad populum alterum

₁₄non reliquit hominem nocere eis et corripuit pro eis reges

₁₅nolite tangere christos meos

et in prophetis meis nolite malignari

₁₆et vocavit famem super terram

omne firmamentum panis contrivit

₁₇misit ante eos virum in servum venundatus est Ioseph

₁₈humiliaverunt in conpedibus pedes eius

ferrum pertransiit anima eius

₁₉donec veniret verbum eius

eloquium Domini inflammavit eum

₂₀misit rex et solvit eum princeps populorum et dimisit eum

₂₁constituit eum dominum domus suae

et principem omnis possessionis suae

₂₂ut erudiret principes eius sicut semet ipsum

et senes eius prudentiam doceret

₂₃et intravit Israhel in Aegyptum

et Iacob accola fuit in terra Cham

₂₄et auxit populum eius vehementer

et firmavit eum super inimicos eius

₂₅convertit cor eorum ut odirent populum eius

ut dolum facerent in servos eius

₂₆misit Mosen servum suum Aaron quem elegit ipsum

₂₇posuit in eis verba signorum suorum

et prodigiorum in terra Cham

₂₈misit tenebras et obscuravit et non exacerbavit sermones suos

₂₉convertit aquas eorum in sanguinem et occidit pisces eorum

₃₀dedit terra eorum ranas

in penetrabilibus regum ipsorum

₃₁dixit et venit cynomia

et scinifes in omnibus finibus eorum

₃₂posuit pluvias eorum grandinem

ignem conburentem in terra ipsorum

₃₃et percussit vineas eorum et ficulneas eorum

et contrivit lignum finium eorum

₃₄dixit et venit lucusta et bruchus cuius non erat numerus

₃₅et comedit omne faenum in terra eorum

et comedit omnem fructum terrae eorum

₃₆et percussit omne primogenitum in terra eorum

primitias omnis laboris eorum

₃₇et eduxit eos in argento et auro

et non erat in tribubus eorum infirmus

₃₈laetata est Aegyptus in profectione eorum

quia incubuit timor eorum super eos

₃₉expandit nubem in protectionem eorum

et ignem ut luceret eis per noctem

₄₀petierunt et venit coturnix et panem caeli saturavit eos

₄₁disrupit petram et fluxerunt aquae abierunt in sicco flumina

₄₂quoniam memor fuit verbi sancti sui

quod habuit ad Abraham puerum suum

₄₃et eduxit populum suum in exultatione

÷et: electos suos in laetitia

₄₄et dedit illis regiones gentium et labores populorum possederunt

₄₅ut custodiant iustificationes eius et legem eius requirant