LIBER TOBIAE 4

₁igitur cum Tobias putaret orationem suam exaudiri ut mori potuisset

vocavit ad se Tobiam filium suum

₂dixitque ei

audi fili mi verba oris mei

et ea in corde tuo quasi fundamentum construe

₃cum acceperit Deus animam meam corpus meum sepeli

et honorem habebis matri tuae omnibus diebus vitae eius

₄memor enim esse debes

quae et quanta pericula passa sit propter te in utero suo

₅cum autem et ipsa conpleverit tempus vitae suae

sepelies eam circa me

₆omnibus autem diebus vitae tuae Deum in mente habe

et cave ne aliquando peccato consentias

et praetermittas praecepta Dei nostri

₇ex substantia tua fac elemosynam

et noli avertere faciem tuam ab ullo paupere

ita enim fiet ut nec a te avertatur facies Domini

₈quomodo potueris ita esto misericors

₉si multum tibi fuerit abundanter tribue

si exiguum fuerit

etiam exiguum libenter inpertire stude

₁₀praemium enim tibi bonum thesaurizas in die necessitatis

₁₁quoniam elemosyna ab omni peccato et a morte liberat

et non patietur animam ire in tenebras

₁₂fiducia magna erit coram summo Deo elemosyna

omnibus qui faciunt eam

₁₃adtende tibi fili mi ab omni fornicatione

et praeter uxorem tuam numquam patiaris crimen scire

₁₄superbiam numquam in tuo sensu aut in tuo verbo dominari permittas

in ipsa enim initium sumpsit omnis perditio

₁₅quicumque aliquid tibi operatus fuerit

statim mercedem ei restitue

et merces mercennarii apud te omnino non maneat

₁₆quod ab alio odis fieri tibi

vide ne alteri tu aliquando facias

₁₇panem tuum cum esurientibus et egenis comede

et de vestimentis tuis nudos tege

₁₈panem tuum et vinum super sepulturam iusti constitue

et noli ex eo manducare et bibere cum peccatoribus

₁₉consilium semper a sapiente perquire

₂₀omni tempore benedic Deum

et pete ab eo ut vias tuas dirigat

et omnia consilia tua in ipso permaneant

₂₁indico etiam tibi fili mi dedisse me decem talenta argenti

dum infantulus esses

Gabelo in Rages civitate Medorum

et chirografum eius apud me habeo

₂₂et ideo perquire quomodo ad eum pervenias

et recipias ab eo supra memoratum pondus argenti

et restituas ei chirografum suum

₂₃noli timere fili mi pauperem quidem vitam gerimus

sed multa bona habemus si timuerimus Deum

et recesserimus ab omni peccato et fecerimus bene