LIBER TOBIAE 3

₁tunc Tobias ingemuit et coepit orare cum lacrimis

₂dicens

iustus es Domine et omnia iudicia tua iusta sunt

et omnes viae tuae misericordia et veritas et iudicium

₃et nunc Domine memor esto mei

ne vindictam sumas de peccatis meis

neque reminiscaris delicta mea vel parentum meorum

₄quoniam non oboedivimus praeceptis tuis

et traditi sumus in direptionem et captivitatem et mortem

et in fabulam et in inproperium

omnibus nationibus in quibus dispersisti nos

₅et nunc Domine magna iudicia tua

quia non egimus secundum praecepta tua

et non ambulavimus sinceriter coram te

₆et nunc Domine secundum voluntatem tuam fac mecum

et praecipe in pace recipi spiritum meum

expedit enim mihi mori magis quam vivere

₇eadem itaque die contigit

ut Sarra filia Raguhel in civitate Medorum

ut et ipsa audiret inproperium ab una ex ancillis patris sui

₈quoniam tradita fuerat septem viris

et daemonium nomine Asmodeus occiderat eos

mox ut ingressi fuissent ad eam

₉ergo cum pro culpa sua increparet puellam respondit ei dicens

amplius ex te non videamus filium aut filiam super terram

interfectrix virorum tuorum

₁₀numquid et me occidere vis

sicut et iam septem occidisti

ad hanc vocem perrexit in superiori cubiculo domus suae

et tribus diebus et tribus noctibus non manducavit neque bibit

₁₁sed in oratione persistens

lacrimis deprecabatur Dominum

ut ab isto inproperio liberaret eam

₁₂factum est autem tertia die

dum conpleret orationem benedicens Dominum

₁₃dixit

benedictum est nomen tuum Deus patrum nostrorum

qui cum iratus fueris misericordiam facies

et in tempore tribulationis peccata dimittis his qui invocant te

₁₄ad te Domine faciem meam converto

ad te oculos meos converto

₁₅peto Domine ut de vinculo inproperii huius absolvas me

aut certe desuper terra eripias me

₁₆tu scis Domine quia numquam concupivi virum

et mundam servavi animam meam ab omni concupiscentia

₁₇numquam cum ludentibus miscui me

neque cum his qui in levitate ambulant participem me praebui

₁₈virum autem cum timore tuo non libidine mea consensi

suscipere

₁₉et aut ego indigna fui illis

aut illi mihi forsitan digni non fuerunt

quia forsitan viro alio conservasti me

₂₀non est enim in hominis potestate consilium tuum

₂₁hoc autem certum habet omnis qui colit te

quia vita eius si in probatione fuerit coronabitur

si autem in tribulatione fuerit liberabitur

et si in correptione fuerit

ad misericordiam tuam pervenire licebit

₂₂non enim delectaris in perditionibus nostris

quia post tempestatem tranquillum facis

et post lacrimationem et fletum exultationem infundis

₂₃sit nomen tuum Deus Israhel benedictum in saecula

₂₄in illo tempore exauditae sunt preces amborum

in conspectu gloriae summi Dei

₂₅et missus est angelus Domini sanctus Rafahel ut curaret ambos

quorum uno tempore fuerat oratio in conspectu Domini recitata