CANTICUM CANTICORUM 3

₁in lectulo meo per noctes quaesivi quem diligit anima mea

quaesivi illum et non inveni

₂surgam et circuibo civitatem

per vicos et plateas quaeram quem diligit anima mea

quaesivi illum et non inveni

₃invenerunt me vigiles qui custodiunt civitatem

num quem dilexit anima mea vidistis

₄paululum cum pertransissem eos inveni quem diligit anima mea

tenui eum nec dimittam

donec introducam illum in domum matris meae

et in cubiculum genetricis meae

₅adiuro vos filiae Hierusalem per capreas cervosque camporum

ne suscitetis neque evigilare faciatis dilectam donec ipsa velit

₆quae est ista quae ascendit per desertum

sicut virgula fumi

ex aromatibus murrae et turis et universi pulveris pigmentarii

₇en lectulum Salomonis sexaginta fortes ambiunt

ex fortissimis Israhel

₈omnes tenentes gladios et ad bella doctissimi

uniuscuiusque ensis super femur suum propter timores nocturnos

₉ferculum fecit sibi rex Salomon de lignis Libani

₁₀columnas eius fecit argenteas

reclinatorium aureum ascensum purpureum

media caritate constravit propter filias Hierusalem

₁₁egredimini et videte filiae Sion regem Salomonem

in diademate quo coronavit eum mater sua

in die disponsionis illius

et in die laetitiae cordis eius