LIBER IESU FILII SIRACH 51

₁oratio iesu filii sirach

Confitebor tibi Domine rex

et conlaudabo te Deum salvatorem meum

₂confiteor nomini tuo

quoniam adiutor et protector factus es mihi

₃et liberasti corpus meum a perditione

a laqueo linguae iniquae et a labiis operantium mendacium

et in conspectu adstantium factus es mihi adiutor

₄et liberasti me secundum multitudinem misericordiae nominis tui

a rugientibus paratis

ad escam

₅de manibus quaerentium animam meam

et de portis tribulationis

quae circumdederunt me

₆a pressura flammae quae circumdedit me

et in medio ignis non sum aestuatus

₇de altitudine ventris inferi

et a lingua coinquinata et verbo mendacii

a rege iniquo et lingua iniusta

₈laudavit usque ad mortem anima mea Dominum

₉et vita mea adpropinquans erat infero deorsum

₁₀circumdederunt me undique et non erat qui adiuvaret

respiciens eram ad adiutorium meum et non erat

₁₁memoratus sum misericordiae tuae Domine

et operationis tuae quae a saeculo sunt

₁₂quoniam erues sustinentes te

et liberas eos de manibus gentium

₁₃exaltasti super terram habitationem meam

et pro morte defluenti deprecatus sum

₁₄invocavi Dominum patrem Domini mei

ut non derelinquat me in die tribulationis meae

et in tempore superborum sine adiutorio

₁₅laudabo nomen tuum adsidue

et conlaudabo illum in confessione

exaudita est oratio mea

₁₆liberasti me de perditione

et eripuisti me de tempore iniquo

₁₇propterea confitebor et laudem dicam tibi

et benedicam nomen Domini

₁₈cum adhuc iunior sum

priusquam oberrem

quaesivi sapientiam palam in oratione mea

₁₉ante tempus postulabam pro illa

et usque in novissimis inquiram eam

defloriet tamquam praecox uva

₂₀laetatum est cor meum in ea

ambulavit pes meus iter rectum

a iuventute mea investigabam eam

₂₁inclinavi modice aurem meam et excepi illam

₂₂multam inveni in me ipso sapientiam

multum profeci in ea

₂₃dans mihi sapientiam dabo gloriam

₂₄consiliatus sum enim ut facerem illam

zelatus sum bonum et non confundor

₂₅conluctata est anima mea in illa

et in faciendo eam confirmatus sum

₂₆manus meas extendi in altum

et insapientia eius

luxi

₂₇animam meam direxi ad illam

et in agnitione inveni eam

₂₈possedi cum ipsis cor ab initio

propter hoc non derelinquar

₂₉venter meus conturbatus est quaerendo illam

propterea possidebo bonam possessionem

₃₀dedit enim mihi Dominus linguam mercedem meam

et in ipsa laudabo eum

₃₁adpropiate ad me indocti

et congregate vos in domum disciplinae

₃₂quid adhuc retardatis et quid dicitis in his

animae vestrae sitiunt vehementer

₃₃aperui os meum et locutus sum

conparate vobis sine argento

₃₄et collum vestrum subicite sub iugo

et suscipiat anima vestra disciplinam

in proximo est enim invenire eam

₃₅videte oculis vestris quoniam modice

laboravi

et inveni mihi multam requiem

₃₆adsumite disciplinam in multo numero argenti

et copiosum aurum possidete in ea

₃₇laetetur anima vestra in misericordia eius

et non confundemini in laude ipsius

₃₈operamini opus vestrum ante tempus

et dabit vobis mercedem vestram in tempore suo