LIBER IESU FILII SIRACH 48

₁et surrexit Helias propheta quasi ignis

et verbum ipsius quasi fax ardebat

₂qui induxit in illos famem

et imitantes illum invidia sua pauci

facti sunt

non poterant enim sustinere praecepta Domini

₃verbo Domini exaltavit caelum

et deiecit a se ignem terrae

₄sic amplificatus est Helias in mirabilibus suis

et quis potest similiter gloriari tibi

₅qui sustulisti mortuum ab inferis

de sorte mortis in verbo Domini Dei

₆qui deiecisti reges ad perniciem

et confregisti facile potentiam ipsorum

et gloriosos de lecto suo

₇qui audis in Sina iudicium

et in Coreb iudicia defensionis

₈qui ungues reges ad paenitentiam

et prophetas facis successores post te

₉qui receptus es in turbine ignis in curru equorum igneorum

₁₀qui inscriptus es indiciis

temporum

et lenis iracundiam Domini

conciliare cor patris ad filium et restituere tribus

Iacob

₁₁beati sunt qui te viderunt et in amicitia tua decorati sunt

₁₂nam nos vita vivimus tantum

post mortem autem non erit tale nomen nostrum

₁₃Helias qui in turbine tectus est

et in Heliseo conpletus est spiritus eius

in diebus suis non pertimuit principem

et potentia nemo vicit illum

₁₄nec superavit illum verbum aliquod

et mortuum prophetavit corpus eius

₁₅in vita sua fecit monstra

et in morte mirabilia opera ipsius

₁₆in omnibus istis non paenituit populum

et non recesserunt a peccatis suis

usque dum deiecti sunt de

terra sua

et dispersi sunt in omnem terram

₁₇et relicta est gens perpauca et princeps in domo David

₁₈quidam ipsorum fecerunt quod placeret Deo

alii autem multa commiserunt peccata

₁₉Ezechias munivit civitatem suam

et induxit in medium ipsius aquam

et fodit ferro rupem et aedificavit ad aquam puteum

₂₀in diebus ipsius ascendit Sennacherim

et misit Rapsacen et sustulit manum suam contra illos

et extulit manum suam in Sion

et superbus factus est potentia sua

₂₁tunc mota sunt corda et manus

ipsorum

et doluerunt quasi parturientes mulieres

₂₂et invocaverunt Dominum misericordem

et patentes manus

extulerunt ad caelum

et sanctus Dominus Deus audivit cito vocem ipsorum

₂₃non est commemoratus peccatorum illorum

neque dedit illos inimicis suis

sed purgavit illos in manu Esaiae sancti prophetae

₂₄subiecit castra Assyriorum

et conteruit illos angelus Dei

₂₅nam fecit Ezechias quod placuit Deo

et fortiter ivit in via David patris sui

quam mandavit illi Esaias propheta

magnus et fidelis in conspectu Dei

₂₆in diebus ipsius retro rediit sol

et addidit regi vitam

₂₇spiritu magno vidit ultima

et obsecratus est lugentes in Sion usque in sempiternum

₂₈ostendit futura et abscondita antequam evenirent