LIBER IESU FILII SIRACH 47

₁post hoc surrexit Nathan propheta in diebus

David

₂et quasi adeps separatus est a carne

sic David a filiis Israhel

₃cum leonibus lusit quasi cum agnis

et in ursis similiter fecit sicut cum agnis ovium

in iuventute sua

₄numquid non occidit gigantem

et extulit obprobrium de

gente

₅in tollendo manum in saxo fundae deiecit exultationem

Goliae

₆ubi invocavit Dominum potentem

et dedit in dexteram eius

tollere hominem fortem in bello

et exaltare cornum gentis suae

₇sic in milibus glorificavit illum

et laudavit eum in benedictionibus Domini

in offerendo illi coronam gloriae

₈conteruit enim inimicos undique

et extirpavit Philisthim contrarios usque in hodiernum diem

conteruit cornum ipsorum usque in

aeternum

₉in omni opere

dedit confessionem Sancto et Excelso in verbo gloriae

₁₀de omni corde suo laudavit Dominum

et dilexit Deum qui fecit illum

et dedit illi contra inimicos potentiam

₁₁et stare fecit cantores contra altarium

et in sono eorum dulces fecit modos

₁₂et dedit in celebrationibus decus

et ornavit tempora usque ad consummationem vitae

ut laudarent sanctum nomen Domini

et amplificarent mane Dei sanctitatem

₁₃Christus purgavit peccata ipsius

et exaltavit in aeternum cornum ipsius

et dedit illi testamentum regum

et sedem gloriae in Israhel

₁₄post ipsum surrexit filius

sensatus

et propter illum deiecit omnem potentiam inimicorum

₁₅Salomon imperavit in diebus pacis

cui subiecit Deus omnes hostes

ut conderet domum in nomine suo

et pararet sanctitatem in sempiternum

quemadmodum eruditus est in iuventute sua

₁₆et impletus est quasi flumen sapientia

et terram retexit anima tua

₁₇et replesti in conparationibus enigmata

ad insulas longe distulisti nomen tuum

et dilectus es in pace tua

₁₈in cantilenis et proverbiis et conparationibus

et interpretationibus miratae sunt te terrae

₁₉et in nomine Domini Dei cui est cognomen Deus Israhel

₂₀collegisti quasi auricalcum aurum

et ut plumbum conplesti argentum

₂₁et reclinasti femora tua mulieribus

potestatem habuisti in tuo corpore

₂₂dedisti maculam in gloria tua

et profugasti semen tuum

inducere iracundiam ad liberos tuos

et incitari stultitiam tuam

₂₃ut faceres imperium bipertitum

et ex Efraim imperare imperium durum

₂₄Deus autem non relinquit misericordiam suam

et non corrumpit nec delebit opera sua

neque perdet ab stirpe nepotes electi sui

et semen eius qui diligit Dominum non corrumpet

₂₅dedit autem reliquum Iacob et David de ipsa stirpe

₂₆et finem habuit Salomon cum patribus suis

₂₇et reliquit post se de semine suo gentis stultitiam

₂₈et mutum prudentia Roboam

qui avertit gentem consilio suo

₂₉et Hieroboam filium Nabath qui peccare fecit Israhel

et dedit Efraim viam peccandi

et plurima redundaverunt peccata ipsorum

₃₀valde

averterunt illos a terra sua

₃₁et quaesivit omnes nequitias

usque dum perveniret ad illos defensio

et ab omnibus peccatis liberavit eos