LIBER IESU FILII SIRACH 21

₁fili peccasti non adicias iterum

sed et de pristinis deprecare

ut tibi remittatur

₂quasi a facie colubri fuge peccata

et si accesseris ad illa suscipient te

₃dentes leonis dentes eius interficientes animas hominum

₄quasi romphea bis acuta omnis iniquitas

plagae illius non est sanitas

₅cataplectatio et iniuriae

adnullabunt substantiam

sic substantia superbiae eradicabitur

₆deprecatio pauperis ex ore usque ad aures eius veniet

et iudicium festinato adveniet illi

₇qui odit correptionem vestigium est peccatoris

et qui timet Deum

convertet ad cor suum

₈notus a longe potens lingua audaci et sensatus scit labi se ab ipso

₉qui aedificat domum inpendiis alienis

quasi qui colligat lapides suos in hieme

₁₀stuppa collecta synagoga peccantium

et consummatio illorum flamma ignis

₁₁via peccantium conplanata lapidibus

et in fine illorum inferi et tenebrae et poena

₁₂qui custodit iustitiam continebit sensum eius

₁₃consummatio timoris Dei sapientia et sensus

₁₄non erudietur qui non est sapiens in bono

₁₅est autem insipientia quae abundat in malo

et non est sensus ubi abundat amaritudo

₁₆scientia sapientis tamquam inundatio abundabit

et consilium illius sicut fons vitae permanet

₁₇cor fatui quasi vas confractum

et omnem sapientiam non tenebit

₁₈verbum sapiens quodcumque audierit scius

laudabit et ad se adiciet

audivit luxuriosus et displicebit illi

et proiciet illud post dorsum suum

₁₉narratio fatui quasi sarcina in via

nam in labiis sensati invenietur gratia

₂₀os prudentis quaeritur in ecclesia

et verba illius cogitabunt in cordibus suis

₂₁tamquam domus exterminata sic fatuo sapientia

et scientia insensati inenarrabilia verba

₂₂conpedes in pedibus stulto doctrina

et quasi vincula manuum supra manum dexteram

₂₃fatuus in risu inaltat vocem suam

vir autem sapiens vix tacite ridebit

₂₄ornamentum aureum prudenti doctrina

et quasi brachiale in brachio dextro

₂₅pes fatui facilis in domum proximi

et homo peritus confundetur a persona potentis

₂₆stultus a fenestra respiciet in domum

vir autem eruditus foris stabit

₂₇stultitia hominis audire per ostium

et prudens gravabitur contumelia

₂₈labia inprudentium stulta narrabunt

verba autem prudentium statera ponderabuntur

₂₉et in ore fatuorum cor illorum

et in corde sapientium os illorum

₃₀dum maledicit impius diabolum maledicit ipse animam suam

₃₁susurrio coinquinabit animam suam

et in omnibus odietur

et qui manserit odiosus erit

tacitus et sensatus honorabitur