LIBER IESU FILII SIRACH 19

₁operarius ebriacus non locupletabitur

et qui spernit modica paulatim decidet

₂vinum et mulieres apostatare faciunt sapientes et arguent sensatos

₃et qui se iungit fornicariis erit nequa

putredo et vermes hereditabunt illum

et extolletur in exemplum maius

et tolletur de numero anima eius

₄qui credit cito levis corde minorabitur

et qui delinquit in animam suam insuper habebitur

₅qui gaudet iniquitati denotabitur

et qui odit correptionem comminuetur vita

et qui odit loquacitatem extinguit malitiam

₆qui peccat in animam suam paenitebitur

et qui iucundatur malitia denotabitur

₇ne iteres verbum nequam et durum et non minoraberis

₈amico et inimico noli enarrare sensum tuum

et si est tibi delictum noli denudare

₉audiet enim te et custodiet te

et quasi defendens peccatum odiet te et sic aderit tibi semper

₁₀audisti verbum adversus proximum conmoriatur in te

fidens quoniam non te disrumpet

₁₁a facie verbi parturit fatuus tamquam gemitus partus infantis

₁₂sagitta infixa femori carnis

sic verbum in corde stulti

₁₃corripe amicum ne forte non intellexerit et dicat non feci

aut si fecerit ne iterum addat facere

₁₄corripe proximum ne forte non dixerit

et si dixerit ne forte iteret

₁₅corripe amicum saepe enim fit commissio

₁₆et non omni verbo credas

est qui labitur lingua sed non ex animo

₁₇quis est enim qui non deliquerit lingua sua

corripe proximum antequam commineris

₁₈et da locum timori Altissimi

quia omnis sapientia timor Dei et in illa timere Deum

et in omni sapientia dispositio legis

₁₉et non est sapientia nequitiae disciplina

et non est cogitatus peccatorum prudentia

₂₀est nequitia et ipsa execratio

et est insipiens qui minuitur sapientia

₂₁melior est homo qui deficit sapientia

et deficiens sensu in timore

quam qui abundat sensu et transgreditur legem Altissimi

₂₂est sollertia certa et ipsa iniqua

₂₃et est qui emittit verbum certum enarrans veritatem

est qui nequiter humiliat se et interiora eius plena sunt dolo

₂₄et est iustus qui se nimium submittit a multa humilitate

et est iustus qui inclinat faciem

et fingit non videre quod ignoratum est

₂₅et si ab inbecillitate virium vetetur peccare

si invenerit tempus malefaciendi malefaciet

₂₆ex visu cognoscitur vir

et ab occursu faciei cognoscitur sensatus

₂₇amictus corporis et risus dentium et ingressus hominis

enuntiant de illo

₂₈est correptio mendax in ira contumeliosi

et est indicium quod non probatur esse

bonum

et est tacens et ipse est prudens