LIBER IESU FILII SIRACH 11

₁sapientia humiliati exaltabit caput illius

et in medio magnatorum consedere illum faciet

₂non laudes virum in specie sua

neque spernas hominem in visu suo

₃brevis in volatilibus est apis

et initium dulcoris habet fructus illius

₄in vestitu ne glorieris umquam

nec in die honoris tui extollaris

quoniam mirabilia opera Altissimi solius

et gloriosa et absconsa et invisa opera illius

₅multi tyranni sederunt in throno

et insuspicabilis portavit diadema

₆multi potentes pressi sunt valide

et gloriosi traditi sunt in manus alterorum

₇priusquam interroges ne vituperes quemquam

et cum interrogaveris corripe iuste

₈priusquam audias ne respondeas verbum

et in medio sermonum ne adicias loqui

₉de re ea quae te non molestat ne certeris

et in iudicio peccantium ne consistas

₁₀fili ne in multis sint actus tui

et si dives fueris non eris inmunis a delicto

si enim secutus fueris non adprehendes

et non effugies si praecucurreris

₁₁est laborans et festinans et dolens impius

et tanto magis non abundat

₁₂est homo marcidus egens recuperatione

plus deficiens virtute et abundans paupertate

₁₃et oculus Dei respexit illum in bono

et erexit illum ab humilitate ipsius

et exaltavit caput eius

et mirati sunt in illo multi et honoraverunt Deum

₁₄bona et mala vita et mors

et paupertas et honestas a Deo sunt

₁₇datio Dei permanet iustis

et profectus illius successus habebunt in aeternum

₁₈est qui locupletatur parce agendo

et haec pars mercedis illius

₁₉in eo quod dicit inveni requiem mihi

et nunc manducabo de bonis meis solus

₂₀et nescit quod tempus praetereat

et relinquet omnia aliis

₂₁sta in testamento tuo et in illo conloquere

et in opere mandatorum tuorum veteresce

₂₂ne manseris in operibus peccatorum

fide autem in Deo et mane in loco tuo

₂₃facile est enim in oculis Dei

de subito honestari pauperem

₂₄benedictio Dei in mercedem iusti festinat

et in honore veloci processus illius fructificat

₂₅ne dicas quid est mihi opus et quae erunt mihi ex hoc bona

₂₆ne dicas sufficiens sum et quid ex hoc pessimabor

₂₇in die bonorum ne inmemor sis malorum

et in die malorum ne inmemor sis bonorum

₂₈quoniam facile coram Deo in die obitus

retribuere unicuique secundum vias suas

₂₉malitia horae oblivionem facit luxuriae magnae

et in fine hominis denudatio operum illius

₃₀ante mortem ne laudes hominem quemquam

quoniam in filiis suis agnoscitur vir

₃₁non omnem hominem inducas in domum tuam

multae enim insidiae sunt dolosi

₃₂sicut enim eructant praecordia fetantium

sicut perdix inducitur in caveam

et ut caprea in laqueum sic et cor superborum

et sicut prospectator videns casum proximi sui

₃₃bona enim in mala convertens insidiatur

et in electis inponet maculam

₃₄ab scintilla una augetur ignis

et ab uno doloso augetur sanguis

homo vero peccator sanguini insidiatur

₃₅adtende te a pestifero fabricat enim mala

ne forte inducat super te subsannationem in perpetuum

₃₆admitte ad te alienigenam

et subvertet te in turbore

et abalienabit te a tuis propriis