LIBER IESU FILII SIRACH 10

₁iudex sapiens vindicabit populum

suum

et principatus sensati stabilis erit

₂secundum iudicem populi sic et ministri eius

et qualis rector est civitatis tales et inhabitantes

₃rex insipiens perdet populum suum

et civitates inhabitabuntur per sensum prudentium

₄in manu Dei potestas terrae

et exclamabilis omnis iniquitas gentium

et utilem rectorem in tempus suscitabit

super illam

₅in manu Dei potestas hominis

et super faciem scribae inponet honorem suum

₆omnis iniuriae proximi ne memineris

et nihil agas in operibus iniuriae

₇odibilis coram Deo et hominibus superbia

et execrabilis omnis iniquitas gentium

₈regnum a gente in gentem transfertur

propter iniustitias et iniurias et contumelias et diversos dolos

₉avaro autem nihil est scelestius

quid superbit terra et cinis

₁₀nihil est iniquius quam amare pecuniam

hic enim et animam suam venalem habet

quoniam in vita sua proiecit intima sua

₁₁omnis potentatus brevis via

₁₂brevem languorem praecidit medicus

sic et rex hodie est et cras morietur

₁₃cum enim moritur homo

hereditabit serpentes et bestias et vermes

₁₄initium superbiae hominis apostatare a Deo

₁₅quoniam ab eo qui fecit illum recessit cor eius

quoniam initium peccati omnis superbia

qui tenuerit illam adimplebitur maledictis

et subvertet eos in finem

₁₆propterea exhonoravit Dominus conventus malorum

et destruxit eos usque in finem

₁₇sedes ducum superborum destruxit Deus

et sedere fecit mites pro illis

₁₈radices gentium superbarum arefecit Deus

et plantavit humiles ex ipsis gentibus

₁₉terras gentium evertit Dominus

et perdidit eas usque ad fundamentum

₂₀arefecit ex ipsis et disperdidit illos

et cessare fecit memoriam eorum a terra

₂₁perdidit Deus memoriam superborum

et reliquit memoriam humilium sensu

₂₂non est creata hominibus superbia

neque iracundia nationi mulierum

₂₃semen hominum honorabitur hoc quod timet Dominum

semen autem hoc exhonorabitur hominum quod praeterit mandata

Domini

₂₄in medio fratrum rector illorum in honore

et qui timent Deum erunt in oculis illius

₂₅gloria divitum honoratorum et pauperum

timor Dei est

₂₆non despicere hominem iustum pauperem

et non magnificare virum peccatorem divitem

₂₇magnus est iudex et potens est in honore

et non est maior illo qui timet Deum

₂₈servo sensato liberi servient

et vir prudens disciplinatus non murmurabit correptus

et inscius non honorabitur

₂₉noli te extollere in faciendo opere tuo

et noli cunctari in tempore angustiae

₃₀melior est qui operatur et abundat in omnibus

quam qui gloriatur et eget panem

₃₁fili in mansuetudine serva animam tuam

et da illi honorem secundum meritum suum

₃₂peccantem in animam suam quis iustificabit

et quis honorificabit exhonorantem animam

suam

₃₃pauper gloriatur per disciplinam et timorem suum

et est homo qui honorificatur propter substantiam suam

₃₄qui gloriatur in paupertate quanto magis in substantia

et qui gloriatur in substantia paupertatem vereatur