PSALMI IUXTA HEBR. 98

₁Dominus regnavit commoveantur populi

sessor cherubin concutiatur terra

₂Dominus in Sion magnus et excelsus est super omnes populos

₃confiteantur nomini tuo magno et terribili sanctoque

₄imperium regis iudicium diligit

tu fundasti aequitates iudicium et iustitiam in Iacob tu fecisti

₅exaltate Dominum Deum nostrum

et adorate scabillum pedum eius quia sanctus est

₆Moses et Aaron in sacerdotibus eius

et Samuhel in his qui invocant nomen eius

invocabant Dominum et ipse exaudivit eos

₇in columna nubis loquebatur ad eos

custodierunt testimonia eius et praeceptum dedit eis

₈Domine Deus noster tu exaudisti eos Domine propitius fuisti eis

et ultor super commutationibus eorum

₉exaltate Dominum Deum nostrum

et adorate in monte sancto eius quia sanctus Dominus Deus noster